حضرت مجاہد سے دریافت کیا گیا کہ محرم حالت احرام میں اگر کسی حلال شخص کے مونچھوں کے بال کاٹ لے؟ آپ نے فرمایا ایک درہم صدقہ کرے۔ [مصنف ابن ابي شيبه/كتاب الحج/حدیث: 13790]

حضرت حسن حالت احرام میں کسی غیر محرم کے بال اور ناخن کاٹنے کو ناپسند کرتے تھے۔ [مصنف ابن ابي شيبه/كتاب الحج/حدیث: 13791]

حضرت عمرو بن دینار فرماتے ہیں کہ مجھے اس شخص نے خبر دی جس نے دیکھا کہ ہمارے اسلاف میں سے ایک نے حالت احرام میں جابر بن زید کا قصر کیا اور انہوں نے احرام کھولا۔ [مصنف ابن ابي شيبه/كتاب الحج/حدیث: 13792]

حضرت عکرمہ سے مروی ہے کہ محرمہ عورت کسی حلال عورت کے بالوں میں کنگھی کرسکتی ہے اور دوسرے کی جو ؤیں مار سکتی ہے۔ [مصنف ابن ابي شيبه/كتاب الحج/حدیث: 13793]

حضرت مجاہد اپنے آقا حضرت سائب بن عبد اللہ سے روایت کرتے ہیں کہ آپ مجھے حکم دیتے تھے کہ میں آل عباس کے سقایہ سے پیوں اور فرماتے تھے، بیشک یہ حج کے مکملات میں سے ہے۔ [مصنف ابن ابي شيبه/كتاب الحج/حدیث: 13794]

حضرت عطاء فرماتے ہیں کہ آل عباس کے سقایہ سے پانی پیو، بیشک مسلمان اس میں سے پیتے ہیں اور یہ سنت ہے۔ [مصنف ابن ابي شيبه/كتاب الحج/حدیث: 13795]

حضرت عبد اللہ بن سائب نے اپنے غلام سے کہا آل عباس کے سقایہ سے پانی پی بیشک اس سے مسلمان پیتے ہیں۔ [مصنف ابن ابي شيبه/كتاب الحج/حدیث: 13796]

حضرت ربیع بن سعد فرماتے ہیں کہ میں نے حضرت ابو جعفر کو دیکھا آپ نے بیت اللہ کا طواف کیا پھر زم زم کے پاس آئے تو آپ کے پاس سقایہ کا نبیذ لایا گیا آپ نے اس میں سے آدھا خود پی لیا اور آدھا حضرت جعفر کو عطا کردیا۔ [مصنف ابن ابي شيبه/كتاب الحج/حدیث: 13797]

حضرت بکر بن عبد اللہ المزنی فرماتے ہیں کہ مجھے مرد کے لیے یہ بات زیادہ پسند ہے کہ وہ سقایہ کی نبیذ پیئے۔ [مصنف ابن ابي شيبه/كتاب الحج/حدیث: 13798]

حضرت محمد بن ابی اسماعیل فرماتے ہیں کہ حضرت سعید بن جبیر سخت گرمی میں منیٰ سے نکلے اور بیت اللہ کے سات چکر لگائے اور دو رکعتیں ادا کیں پھر سقایہ پر آئے تو ہمیں محمد بن علی رحمہ اللہ نے نبیذ پلایا، اس میں سے حضرت سعید بن جبیر نے پیا اور پھر مجھے پلایا۔! سقایہ سے مراد خادمین حرم مکی کا وہ محکمہ ہے جس کے ذمے حجاج کرام کو پانی پلانا ہے۔ [مصنف ابن ابي شيبه/كتاب الحج/حدیث: 13799]