حضرت مالک بن مغول سے روایت ہے وہ کہتے ہیں کہ حضرت مرہ سے پوچھا گیا آپ کی کتنی نماز باقی ہے؟ انہوں نے فرمایا: آدھی یعنی دو سو پچاس رکعات۔ [مصنف ابن ابي شيبه/كتاب الزهد/حدیث: 37614]

حضرت مرہ سے { وَأَفْئِدَتُہُمْ ہَوَائٌ} کے بارے میں روایت ہے وہ کہتے ہیں: پھٹے ہوں گے کسی شے کی حفاظت نہیں کریں گے۔ [مصنف ابن ابي شيبه/كتاب الزهد/حدیث: 37615]

حضرت عمارہ، حضرت اسود کے بارے میں روایت کرتے ہیں کہتے ہیں کہ وہ راہبوں میں سے ایک راہب تھے۔ [مصنف ابن ابي شيبه/كتاب الزهد/حدیث: 37616]

حضرت شعبی سے روایت ہے کہتے ہیں (ان سے) حضرت اسود کے بارے میں سوال کیا گیا؟ تو انہوں نے فرمایا: وہ خوب روزہ رکھنے والے، خوب حج کرنے والے اور خوب قیام کرنے والے تھے۔ [مصنف ابن ابي شيبه/كتاب الزهد/حدیث: 37617]

حضرت منصور کے بعض شاگردوں سے روایت ہے وہ کہتے ہیں کہ حضرت اسود رحمہ اللہ شدید گرمی کے دن بھی روزہ رکھتے تھے۔ وہ دن جس کے بارے میں خیال ہوتا تھا کہ طاقتور سرخ اونٹ بھی گرمی کی وجہ سے لڑکھڑانے لگتا ہے۔ [مصنف ابن ابي شيبه/كتاب الزهد/حدیث: 37618]

حضرت علی بن مدرک رحمہ اللہ بیان کرتے ہیں کہ حضرت علقمہ، حضرت اسود کو کہا کرتے تھے۔ آپ اس جسم کو کیوں عذاب دیتے ہیں؟ اسود کہتے تھے میں اس کی راحت چاہتا ہوں۔ [مصنف ابن ابي شيبه/كتاب الزهد/حدیث: 37619]

حضرت حنش بن حارث کہتے ہیں کہ میں نے حضرت اسود بن یزید کو دیکھا کہ ان کی ایک آنکھ روزے کی وجہ سے ضائع ہوگئی تھی۔ [مصنف ابن ابي شيبه/كتاب الزهد/حدیث: 37620]

حضرت ریاح نخعی سے روایت ہے وہ کہتے ہیں کہ حضرت اسود، سفر میں روزہ رکھا کرتے تھے۔ یہاں تک کہ غیر رمضان میں سخت گرمی کے دن پیاس کی وجہ سے ان کا رنگ متغیر ہوجاتا تھا۔ [مصنف ابن ابي شيبه/كتاب الزهد/حدیث: 37621]

حضرت علقمہ کے بارے میں روایت ہے کہ وہ اپنے ساتھیوں سے کہتے تھے۔ ہمارے ساتھ چلو تاکہ ہم اپنا ایمان زیادہ کریں۔ [مصنف ابن ابي شيبه/كتاب الزهد/حدیث: 37622]

حضرت ابن عون سے روایت ہے وہ کہتے ہیں کہ حضرت شعبی سے علقمہ کے بارے میں سوال کیا گیا؟ تو انہوں نے فرمایا: وہ سست کے ساتھ تھے لیکن تیز رفتار کو پکڑ لیتے تھے۔ [مصنف ابن ابي شيبه/كتاب الزهد/حدیث: 37623]