ایک اور سند کے ہمراہ نبی کریم صلی اللہ علیہ وسلم کے بارے میں یہ بات منقول ہے: سات تکبیریں پہلی رکعت میں ہوں گی اور پانچ تکبیریں دوسری رکعت میں ہوں گی اور دونوں رکعت میں قراءت ان تکبیروں کے بعد ہو گی۔ [سنن الدارقطني/ كتاب العيدين/حدیث: 1729]

عمرو بن شعیب اپنے والد کے حوالے سے، اپنے دادا کا یہ بیان نقل کرتے ہیں: نبی کریم صلی اللہ علیہ وسلم نے عید الفطر کے دن پہلی رکعت میں سات تکبیریں کہیں اور دوسری رکعت میں پانچ تکبیریں کہیں، یہ نماز کی تکبیروں کے علاوہ تھیں۔ [سنن الدارقطني/ كتاب العيدين/حدیث: 1730]

کثیر بن عبداللہ اپنے والد کے حوالے سے اپنے دادا کا یہ بیان نقل کرتے ہیں: نبی کریم صلی اللہ علیہ وسلم عیدین کی نماز میں تکبیریں کہا کرتے تھے، پہلی رکعت میں سات تکبیریں کہتے تھے اور دوسری رکعت میں پانچ تکبیریں کہا کرتے تھے۔ بخاری نے اپنی روایت میں یہ الفاظ اضافی نقل کیے ہیں: قراءت کرنے سے پہلے (تکبیریں کہتے تھے)۔ [سنن الدارقطني/ كتاب العيدين/حدیث: 1731]

سیدنا عبداللہ بن عمر رضی اللہ عنہما بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”عیدین میں تکبیریں کہی جائیں گی، پہلی رکعت میں سات تکبیریں ہوں گی اور دوسری رکعت میں پانچ تکبیریں ہوں گی۔“ [سنن الدارقطني/ كتاب العيدين/حدیث: 1732]

ابوطفیل رحمہ اللہ، سیدنا علی بن ابوطالب اور سیدنا عمار بن یاسر رضی اللہ عنہما کے بارے میں یہ بات بیان کرتے ہیں: ان دونوں حضرات نے نبی کریم صلی اللہ علیہ وسلم کو سنا کہ آپ فرض نماز میں سورۃ فاتحہ کے ساتھ بسم اللہ پڑھا کرتے تھے۔ آپ صلی اللہ علیہ وسلم فجر کی نماز میں اور وتر کی نماز میں دعائے قنوت پڑھا کرتے تھے اور آپ ایام تشریق میں عرفہ کے دن کی صبح کی فجر کی نماز سے لے کر ایام تشریق کے آخری دن عصر کی نماز تک، جس دن لوگ بڑی تعداد میں روانہ ہوتے ہیں، ہر فرض نماز کے بعد تکبیر پڑھا کرتے تھے۔ [سنن الدارقطني/ كتاب العيدين/حدیث: 1733]

سیدنا علی اور سیدنا عمار رضی اللہ عنہما بیان کرتے ہیں: نبی کریم صلی اللہ علیہ وسلم فرض نماز میں بلند آواز میں بسم اللہ الرحمن الرحیم پڑھا کرتے تھے۔ آپ صلی اللہ علیہ وسلم فجر کی نماز میں دعائے قنوت پڑھا کرتے تھے اور آپ صلی اللہ علیہ وسلم عرفہ کے دن صبح کی نماز کے بعد تکبیر پڑھنا شروع کرتے تھے اور ایام تشریق کے آخری دن عصر کی نماز کے بعد اسے ختم کرتے تھے (یعنی ہر نماز کے بعد پڑھا کرتے تھے)۔ [سنن الدارقطني/ كتاب العيدين/حدیث: 1734]

امام محمد الباقر رضی اللہ عنہ، امام زین العابدین رحمہ اللہ کے حوالے سے سیدنا جابر رضی اللہ عنہ کا یہ بیان نقل کرتے ہیں: نبی کریم صلی اللہ علیہ وسلم عرفہ کے دن فجر کی نماز کے بعد تکبیر پڑھا کرتے تھے اور ایام تشریق کے آخری دن عصر کی نماز تک پڑھتے رہتے تھے، یہ تکبیر آپ اس وقت پڑھتے تھے، جب آپ فرض نماز کے بعد سلام پھیرتے تھے۔ [سنن الدارقطني/ كتاب العيدين/حدیث: 1735]

امام محمد الباقر رضی اللہ عنہ، سیدنا جابر بن عبداللہ رضی اللہ عنہ کے حوالے سے یہ بات نقل کرتے ہیں: نبی کریم صلی اللہ علیہ وسلم عرفہ کے دن تکبیر کہتے تھے اور یہ عمل ایام تشریق کے آخری دن ختم کرتے تھے۔ [سنن الدارقطني/ كتاب العيدين/حدیث: 1736]

سیدنا جابر بن عبداللہ رضی اللہ عنہ بیان کرتے ہیں: نبی کریم صلی اللہ علیہ وسلم نے عرفہ کے دن جب صبح کی نماز ادا کی، تو آپ صلی اللہ علیہ وسلم نے اپنے ساتھیوں کی طرف رخ کر کے فرمایا: ”اپنی جگہ پر رہو۔“ پھر آپ صلی اللہ علیہ وسلم نے یہ پڑھنا شروع کیا: ”اللہ سب سے بڑا ہے، اللہ سب سے بڑا ہے، اللہ سب سے بڑا ہے، اللہ سب سے بڑا ہے، اللہ کے سوا کوئی معبود نہیں، اللہ سب سے بڑا ہے، اللہ سب سے بڑا ہے، ہر طرح کی حمد اللہ کے لیے مخصوص ہے۔“ نبی کریم صلی اللہ علیہ وسلم عرفہ کے دن صبح کے وقت یہ تکبیر پڑھنا شروع کرتے اور ایام تشریق کے آخری دن عصر کی نماز تک اسے (ہر نماز کے بعد) پڑھتے رہے۔ [سنن الدارقطني/ كتاب العيدين/حدیث: 1737]

سیدنا عبداللہ بن سائب رضی اللہ عنہ بیان کرتے ہیں: میں نبی کریم صلی اللہ علیہ وسلم کی اقتداء میں عید کی نماز میں شریک ہوا، جب آپ صلی اللہ علیہ وسلم نے نماز ختم کی، تو ارشاد فرمایا: ”اب ہم خطبہ دیں گے، جو شخص چاہے وہ بیٹھا رہے (یعنی خطبہ سننے کے لیے بیٹھا رہے) اور جو شخص جانا چاہے، وہ چلا جائے۔“ [سنن الدارقطني/ كتاب العيدين/حدیث: 1738]