جابر بن عبد اللہ رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جس شخص نے میرے اس منبر پر جھوٹی قسم کھائی، اس نے اپنا ٹھکانہ جہنم بنالیا۔“ [مسند امام شافعی/ كتاب القضاء والأحكام والدعاوى والبينات واليمين ومع الشاهد والأيمان والشهادات /حدیث: 1720]

ابو غطفان المری نے بیان فرمایا کہ زید بن ثابت رضی اللہ عنہ اور ابن مطیع نے اپنے ایک (مشترکہ) گھر کے جھگڑے کا مقدمہ مروان بن حکم کے سامنے رکھا، تو مروان نے اس بات پر فیصلہ دیا کہ زید بن ثابت رضی اللہ عنہ منبر پر قسم کھائیں۔ زید رضی اللہ عنہ نے فرمایا: ”میں اپنی جگہ پر ہی قسم کھاؤں گا۔“ مروان نے کہا: ”نہیں اللہ کی قسم! وہیں قسم کھاؤ جہاں لوگوں کے فیصلے ہوتے ہیں (یعنی منبر پر)۔“ تو زید رضی اللہ عنہ یہ قسم کھاتے تھے کہ میں سچا ہوں لیکن منبر پر قسم کھانے سے انکار کرتے تھے اور مروان کو اس بات پر تعجب ہوتا تھا۔ امام مالک رحمہ اللہ نے فرمایا کہ زید رضی اللہ عنہ نے زبردستی قسم لینے کو ناپسند کیا ہے۔ [مسند امام شافعی/ كتاب القضاء والأحكام والدعاوى والبينات واليمين ومع الشاهد والأيمان والشهادات /حدیث: 1721]

ابن ابی ملیکہ نے بیان کیا کہ میں نے ابن عباس رضی اللہ عنہما کو طائف سے دو لونڈیوں کے متعلق لکھا جن میں سے ایک نے دوسری کو مارا تھا اور اس وقت کوئی گواہ بھی نہیں تھا، تو انہوں نے میری طرف جواب میں لکھ بھیجا کہ ان کو عصر کے بعد روک اور ان پر یہ آیت پڑھ کہ ”جو لوگ اللہ کے عہد اور اپنی قسموں کو تھوڑی قیمت پر بیچتے ہیں۔“ (آل عمران: 77)۔ ابن ابی ملیکہ کہتے ہیں میں نے اسی طرح کیا تو ان میں سے ایک نے (جرم کا) اعتراف کر لیا۔ [مسند امام شافعی/ كتاب القضاء والأحكام والدعاوى والبينات واليمين ومع الشاهد والأيمان والشهادات /حدیث: 1722]

عطاء نے بیان فرمایا کہ میں اور عبید بن عمیر عائشہ رضی اللہ عنہا کے پاس گئے جبکہ وہ شہیر مقام پر اعتکاف بیٹھی ہوئی تھیں۔ میں نے ان سے اللہ کے فرمان ”اللہ تم سے تمہاری لغو قسموں پر مواخذہ نہیں کرے گا“ (البقرہ: 225) سے متعلق پوچھا تو انہوں نے فرمایا: ”یہ وہ (قسمیں ہیں جو لوگوں کا تکیہ کلام ہوں جیسے) نہیں اللہ کی قسم! ہاں اللہ کی قسم!“ [مسند امام شافعی/ كتاب القضاء والأحكام والدعاوى والبينات واليمين ومع الشاهد والأيمان والشهادات /حدیث: 1723]

عائشہ رضی اللہ عنہا نے بیان فرمایا کہ لغو قسم یہ ہے کہ انسان (عادتاً) کہے: ”نہیں اللہ کی قسم!“ اور ”ہاں اللہ کی قسم!“ [مسند امام شافعی/ كتاب القضاء والأحكام والدعاوى والبينات واليمين ومع الشاهد والأيمان والشهادات /حدیث: 1724]

ابن عمر رضی اللہ عنہما سے روایت ہے انہوں نے فرمایا: ”جس نے قسم کھائی اور پھر اسے پختہ کر دیا تو (اس کو توڑنے پر) اس پر ایک گردن آزاد کرانا ضروری ہے۔“ [مسند امام شافعی/ كتاب القضاء والأحكام والدعاوى والبينات واليمين ومع الشاهد والأيمان والشهادات /حدیث: 1725]