ابو ہریرہ رضی اللہ عنہ سے روایت ہے کہ سعد رضی اللہ عنہ نے عرض کیا: ”اے اللہ کے رسول صلی اللہ علیہ وسلم ! اگر میں اپنی بیوی کے ساتھ کسی مرد کو پاؤں تو کیا چار گواہ لانے تک اسے مہلت دوں؟“ تو رسول اللہ صلی اللہ علیہ وسلم نے فرمایا: ”ہاں۔“ [مسند امام شافعی/ كتاب القضاء والأحكام والدعاوى والبينات واليمين ومع الشاهد والأيمان والشهادات /حدیث: 1700]

ابن مسیب سے روایت ہے کہ علی بن ابی طالب رضی اللہ عنہ سے ایک ایسے آدمی سے متعلق پوچھا گیا جس نے اپنی بیوی کے ساتھ کسی دوسرے مرد کو پایا اور اس کو قتل کر دیا یا اپنی عورت کو قتل کر دیا، تو فرمایا: ”اگر چار گواہ نہ لائے تو خود قتل پر تیار ہو جائے۔“ [مسند امام شافعی/ كتاب القضاء والأحكام والدعاوى والبينات واليمين ومع الشاهد والأيمان والشهادات /حدیث: 1701]

سعید بن مسیب سے روایت ہے کہ شام میں ایک آدمی نے اپنی بیوی کے ساتھ غیر مرد کو پایا تو اسے قتل کر دیا یا اس عورت کو قتل کر دیا۔ تو (شام کے حاکم) معاویہ رضی اللہ عنہ نے ابو موسیٰ اشعری رضی اللہ عنہ کو لکھا کہ ان کے لیے تم یہ مسئلہ علی رضی اللہ عنہ سے پوچھو۔ انہوں نے علی رضی اللہ عنہ سے پوچھا تو آپ رضی اللہ عنہ نے فرمایا: ”یہ واقعہ عراق کی سرزمین میں نہیں ہوا، میں آپ کو قسم دیتا ہوں کہ سچ بیان کرو۔“ پھر انہوں نے حقیقت بتادی، تو علی رضی اللہ عنہ نے فرمایا: ”میں ابوالحسن ہوں، اگر وہ چار گواہ نہیں لاتا تو قتل پر راضی ہو جائے۔“ [مسند امام شافعی/ كتاب القضاء والأحكام والدعاوى والبينات واليمين ومع الشاهد والأيمان والشهادات /حدیث: 1702]

سفیان بن عیینہ رحمہ اللہ نے بیان کیا کہ میں نے زہری رحمہ اللہ سے سنا انہوں نے فرمایا کہ عراق والے یہ سمجھتے ہیں کہ تہمت لگانے والے کی شہادت جائز نہیں ہے۔ اور میں گواہی دیتا ہوں کہ مجھے سعید بن مسیب رحمہ اللہ نے بتایا کہ عمر بن خطاب رضی اللہ عنہ نے ابوبکرہ رضی اللہ عنہ سے کہا: ”تو توبہ کر لے تو تیری گواہی قبول کی جائے گی یا اگر تو توبہ کرتا ہے تو تیری گواہی قبول کی جائے گی۔“ امام شافعی رحمہ اللہ نے فرمایا، میں نے سفیان بن عیینہ رحمہ اللہ کو کئی دفعہ اسی طرح بیان کرتے ہوئے سنا پھر میں نے ان کو فرماتے ہوئے سنا کہ مجھے اس میں شک ہوا ہے۔ امام شافعی رحمہ اللہ نے فرمایا: میں گواہی دیتا ہوں کہ مجھے فلاں نے بتایا، پھر آدمی کا نام لیا جسے میں یاد نہ رکھ سکا تو میں نے ان سے پوچھا تو مجھے عمر بن قیس نے بتایا کہ وہ سعید بن مسیب سے روایت کرتے ہیں۔ اور سفیان رحمہ اللہ، سعید بن مسیب کے متعلق شک نہیں کرتے تھے۔ امام شافعی رحمہ اللہ نے فرمایا: اور ان کے علاوہ کوئی اور اسے ابن شہاب سے روایت کرتا ہے وہ سعید بن مسیب رحمہ اللہ سے اور وہ عمر رضی اللہ عنہ سے روایت کرتے ہیں۔ [مسند امام شافعی/ كتاب القضاء والأحكام والدعاوى والبينات واليمين ومع الشاهد والأيمان والشهادات /حدیث: 1703]

ہمیں سفیان بن عیینہ نے خبر دی انہوں نے کہا مجھے زہری نے خبر دی۔ پھر جب ہم (مجلس سے) کھڑے ہوئے تو مجھے عمر بن قیس نے کہا جو میرے ساتھ مجلس میں موجود تھے کہ وہ سعید بن مسیب ہیں۔ میں نے سفیان رحمہ اللہ سے پوچھا: ”کیا سعید بن مسیب رحمہ اللہ نے جب آپ کو خبر دی اسی وقت آپ کو شک لاحق ہوا؟“ فرمایا: ”نہیں وہ اسی طرح ہی ہے جس طرح انہوں نے فرمایا البتہ انہوں نے مجھے شک میں ڈال دیا۔“ [مسند امام شافعی/ كتاب القضاء والأحكام والدعاوى والبينات واليمين ومع الشاهد والأيمان والشهادات /حدیث: 1704]

سعيد بن مسیب رحمہ اللہ سے روایت ہے کہ جب عمر بن خطاب رضی اللہ عنہ نے تین آدمیوں کو حدِ قذف لگائی تو ان سے توبہ کروائی، ان میں سے دو نے رجوع کر لیا تو ان دونوں کی شہادت کو قبول کیا، جبکہ ابوبکرہ رضی اللہ عنہ نے رجوع سے انکار کر دیا تو ان کی گواہی کو بھی رد کر دیا۔ [مسند امام شافعی/ كتاب القضاء والأحكام والدعاوى والبينات واليمين ومع الشاهد والأيمان والشهادات /حدیث: 1705]

ابن جریج سے روایت ہے، انہوں نے عطاء رحمہ اللہ سے کہ انہوں نے عورتوں کی گواہی عورتوں کے کسی معاملے میں قبول کرنے کے متعلق فرمایا: ”چار سے کم کی گواہی اس میں جائز نہیں ہے۔“ [مسند امام شافعی/ كتاب القضاء والأحكام والدعاوى والبينات واليمين ومع الشاهد والأيمان والشهادات /حدیث: 1706]

عطاء رحمہ اللہ سے روایت ہے انہوں نے فرمایا: ”عورتوں کے معاملے میں عورتوں کی گواہی کہ ان کے ساتھ کوئی مرد نہ ہو، تو چار عادل عورتوں سے کم کی جائز نہیں ہے۔“ [مسند امام شافعی/ كتاب القضاء والأحكام والدعاوى والبينات واليمين ومع الشاهد والأيمان والشهادات /حدیث: 1707]

ابن ابی ملیکہ سے روایت ہے کہ ابن عباس رضی اللہ عنہ نے بچوں کی گواہی کے متعلق فرمایا: ”جائز نہیں ہے۔“ ابن جریج نے ابن ابی ملیکہ سے ابن عباس رضی اللہ عنہ کے واسطہ سے یہ الفاظ زیادہ بیان کیے: ”کیونکہ اللہ تعالیٰ فرماتے ہیں: ”جنہیں تم گواہوں میں سے پسند کرو۔“ (البقرہ: 282) [مسند امام شافعی/ كتاب القضاء والأحكام والدعاوى والبينات واليمين ومع الشاهد والأيمان والشهادات /حدیث: 1708]

ابن عباس رضی اللہ عنہ سے روایت ہے کہ رسول اللہ صلی اللہ علیہ وسلم نے قسم کے ساتھ ایک گواہ پر فیصلہ دیا۔ [مسند امام شافعی/ كتاب القضاء والأحكام والدعاوى والبينات واليمين ومع الشاهد والأيمان والشهادات /حدیث: 1709]