ام مبشر رضی اللہ عنہا سے روایت ہے کہ وہ نبی اکرم صلی اللہ علیہ وسلم کی خدمت میں حاضر ہوئیں، اور مخلد بن خالد (کی مذکورہ بالا روایت کے ہم معنی) بیان کیا۔ جیسے کہ حدیث جابر میں آیا ہے۔ انہوں نے کہا کہ حضرت بشر بن براء بن معرور وفات پا گئے تو رسول اللہ صلی اللہ علیہ وسلم نے اس عورت کو بلوایا اور اس سے پوچھا: ”تجھے اس کارستانی پر کس چیز نے آمادہ کیا؟“ اور جابر کی حدیث کی مانند روایت کیا۔ تب رسول اللہ صلی اللہ علیہ وسلم نے اس کے متعلق حکم دیا اور اسے قتل کر دیا گیا اور پچھنے لگوانے کا ذکر نہیں کیا۔ [سنن ابي داود/كتاب الديات /حدیث: 4514]

سیدنا سمرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”جو شخص اپنے غلام کو قتل کرے گا ہم اسے قتل کریں گے اور جو اپنے غلام کی ناک کاٹے گا ہم اس کی ناک کاٹیں گے۔“ [سنن ابي داود/كتاب الديات /حدیث: 4515]

جناب قتادہ رحمہ اللہ نے اپنی سند سے مذکورہ بالا روایت کی مثل روایت کیا، انہوں نے کہا کہ رسول اللہ صلی اللہ علیہ وسلم نے فرمایا: ”جس نے اپنے غلام کو خصی کیا ہم اسے خصی کر دیں گے۔“ اور پھر شعبہ اور حماد کی حدیث کی مثل روایت کیا (یعنی جو اوپر مذکورہ ہوئی ہے)۔ امام ابوداؤد رحمہ اللہ فرماتے ہیں کہ اسے ابوداؤد طیالسی نے بواسطہ ہشام روایت کیا اور حدیثِ معاذ کی طرح بیان کیا۔ [سنن ابي داود/كتاب الديات /حدیث: 4516]

جناب قتادہ نے بسند شعبہ مذکورہ بالا روایت کی مثل روایت کیا۔ مزید کہا کہ پھر حسن یہ حدیث بھول گئے اور کہا کرتے تھے کہ ”کسی آزاد کو کسی غلام کے بدلے میں قتل نہیں کیا جائے گا۔“ [سنن ابي داود/كتاب الديات /حدیث: 4517]

ہشام نے بواسطہ قتادہ، حسن رحمہ اللہ سے روایت کیا، انہوں نے کہا کہ ”آزاد سے غلام کا قصاص نہیں لیا جاتا۔“ [سنن ابي داود/كتاب الديات /حدیث: 4518]

جناب عمرو بن شعیب رحمہ اللہ اپنے والد سے، وہ اپنے دادا رضی اللہ عنہ سے روایت کرتے ہیں کہ ایک آدمی چلاتا ہوا نبی کریم صلی اللہ علیہ وسلم کے پاس آیا اور کہنے لگا: ”اس کی لونڈی تھی، اے اللہ کے رسول!“ آپ صلی اللہ علیہ وسلم نے فرمایا: ”افسوس تجھ پر، تجھے کیا ہوا ہے؟“ اس نے کہا: ”بہت برا ہوا ہے۔ میں نے اپنے مالک کی لونڈی کو دیکھ لیا، تو اسے غیرت آئی اور پھر اس نے میرا ذکر کاٹ ڈالا ہے۔“ رسول اللہ صلی اللہ علیہ وسلم نے فرمایا: ”اس آدمی کو میرے پاس لاؤ۔“ اسے ڈھونڈا گیا مگر نہ لا سکے۔ تو آپ صلی اللہ علیہ وسلم نے غلام سے فرمایا: ”جاؤ تم آزاد ہو۔“ اس نے کہا: ”اے اللہ کے رسول! (اگر وہ مجھے دوبارہ غلام بنانے کی کوشش کرے تو) میری مدد کون کرے گا؟“ آپ صلی اللہ علیہ وسلم نے فرمایا: ”ہر مسلمان۔“ یا فرمایا: ”ہر مومن۔“ امام ابوداؤد رحمہ اللہ فرماتے ہیں کہ آزاد کیے جانے والے کا نام روح بن دینار تھا۔ امام ابوداؤد رحمہ اللہ فرماتے ہیں کہ جس نے اس کا ذکر کاٹا اس کا نام زنباع تھا۔ امام ابوداؤد رحمہ اللہ کہتے ہیں کہ زنباع ابوروح ہے، یہ اس غلام (روح بن دینار) کا آقا تھا۔ [سنن ابي داود/كتاب الديات /حدیث: 4519]

سیدنا سہل بن ابی حثمہ اور رافع بن خدیج رضی اللہ عنہما سے روایت ہے کہ محیصہ بن مسعود اور عبداللہ بن سہل خیبر کی جانب روانہ ہوئے اور کھجوروں کے باغات میں جدا جدا ہو گئے۔ پس عبداللہ بن سہل کو قتل کر دیا گیا۔ سو انہوں نے (وہاں کے) یہودیوں پر الزام لگایا۔ پھر اس (مقتول) کا بھائی عبدالرحمٰن بن سہل اور اس کے چچا زاد حویصہ اور محیصہ نبی کریم صلی اللہ علیہ وسلم کے پاس حاضر ہوئے۔ عبدالرحمٰن اپنے بھائی کے معاملے میں بات کرنے لگا جبکہ وہ ان سب سے چھوٹا تھا، تو رسول اللہ صلی اللہ علیہ وسلم نے فرمایا: ”بڑے کو بات کرنے دو۔“ یا فرمایا: ”پہلے بڑا بات شروع کرے۔“ پھر ان دونوں نے اپنے بھائی کے بارے میں بات کی تو رسول اللہ صلی اللہ علیہ وسلم نے فرمایا: ”تم میں سے پچاس آدمی ان کے کسی کے خلاف پچاس قسمیں کھائیں تو اس ملزم کی رسی تمہارے حوالے کر دی جائے گی۔“ انہوں نے کہا: ”یہ ایسا معاملہ ہے جو ہم نے اپنی آنکھوں سے نہیں دیکھا تو ہم قسمیں کیسے کھائیں؟“ رسول اللہ صلی اللہ علیہ وسلم نے فرمایا: ”پھر یہودی پچاس قسمیں دے کر تم سے بری ہو جائیں گے۔“ انہوں نے کہا: ”اے اللہ کے رسول! یہ کافر لوگ ہیں۔“ (ان کی قسموں کا کیا اعتبار؟) الغرض رسول اللہ صلی اللہ علیہ وسلم نے اپنی طرف سے اس کی دیت ادا فرمائی۔ سہل کہتے ہیں: ”میں ایک دن ان کے باڑے میں چلا گیا تو ان اونٹنیوں میں سے ایک نے مجھے لات دے ماری۔“ حماد بن زید نے یہی یا اس کے قریب قریب بیان کیا۔ امام ابوداؤد رحمہ اللہ فرماتے ہیں کہ اس روایت کو بشر بن مفضل اور مالک نے یحییٰ بن سعید سے نقل کیا اور کہا: ”کیا تم لوگ پچاس قسمیں کھاؤ گے کہ اپنے عزیز کے خون کے حقدار بن سکو؟ یا قاتل کے حقدار بن سکو؟“ بشر نے ”خون کے حقدار بننے“ کا ذکر نہیں کیا۔ اور عبدہ نے بواسطہ یحییٰ وہی کہا ہے جیسے کہ حماد نے کہا۔ اور ابن عیینہ کی روایت جو یحییٰ سے ہے اس میں اس نے ابتدائی طور پر یوں کہا ہے: ”یہودی پچاس قسمیں کھا کر تم سے بری ہو جائیں گے۔“ اور ”حقدار بننے“ کا ذکر نہیں کیا۔ امام ابوداؤد رحمہ اللہ کہتے ہیں کہ یہ ابن عیینہ کا وہم ہے۔ [سنن ابي داود/كتاب الديات /حدیث: 4520]

سیدنا سہل بن ابو حثمہ رضی اللہ عنہ اور ان کی قوم کے بڑوں نے خبر دی کہ عبداللہ بن سہل اور محیصہ کو مالی مشکلات کا سامنا تھا تو وہ دونوں (محنت مزدوری کی تلاش میں) خیبر کی طرف نکل گئے۔ پھر محیصہ کو خبر دی گئی کہ عبداللہ بن سہل کو قتل کر کے ایک کنویں یا چشمے میں پھینک دیا گیا ہے۔ تو وہ یہودیوں کے پاس گیا اور کہا: ”اللہ کی قسم! تم لوگوں ہی نے اس کو قتل کیا ہے۔“ انہوں نے جواب دیا: ”اللہ کی قسم! ہم نے اس کو قتل نہیں کیا۔“ پھر وہ چلا آیا اور اپنی قوم کے پاس پہنچا اور ان کو سب بتایا۔ تو وہ اور اس کا بڑا بھائی حویصہ اور عبدالرحمٰن بن سہل (رسول اللہ صلی اللہ علیہ وسلم کی خدمت میں) حاضر ہوئے۔ تو محیصہ بات کرنے لگا اور یہی تھا جو خیبر میں گیا تھا تو رسول اللہ صلی اللہ علیہ وسلم نے فرمایا: ”بڑے کا خیال کر۔“ یعنی جو عمر میں بڑا ہے۔ پھر حویصہ نے بات کی۔ پھر محیصہ نے کی۔ تو رسول اللہ صلی اللہ علیہ وسلم نے فرمایا: ”وہ لوگ تمہارے آدمی کی یا تو دیت دیں گے ورنہ جنگ کے تیار رہیں۔“ پھر رسول اللہ صلی اللہ علیہ وسلم نے انہیں یہ تفصیل لکھ بھیجی۔ انہوں نے جواباً لکھا: ”اللہ کی قسم! ہم نے اسے قتل نہیں کیا۔“ تو رسول اللہ صلی اللہ علیہ وسلم نے حویصہ، محیصہ اور عبدالرحمٰن سے فرمایا: ”کیا تم لوگ قسمیں کھاؤ گے کہ اپنے آدمی کے خون کے حقدار بن سکو؟“ انہوں نے کہا: ”نہیں۔“ آپ صلی اللہ علیہ وسلم نے فرمایا: ”پھر تمہارے مقابلے میں یہودی قسمیں کھائیں گے۔“ ان لوگوں نے کہا: ”وہ تو مسلمان نہیں ہیں۔“ (یعنی ان کی قسموں کا کیونکر اعتبار کریں؟) چنانچہ رسول اللہ صلی اللہ علیہ وسلم نے اپنی طرف سے اس کی دیت ادا فرمائی اور سو اونٹنیاں ان کی طرف بھیج دیں حتیٰ کہ ان کے احاطے میں داخل کر دی گئیں۔ سہل رضی اللہ عنہ کہتے ہیں کہ ان میں سے ایک سرخ اونٹنی نے مجھے لات دے ماری تھی۔ [سنن ابي داود/كتاب الديات /حدیث: 4521]

جناب عمرو بن شعیب روایت کرتے ہیں کہ رسول اللہ صلی اللہ علیہ وسلم نے بنو نصر بن مالک کے ایک آدمی کو قسامت کے فیصلے کی بنا پر (قصاص میں) قتل کیا تھا۔ یہ قبیلہ (طائف کے مضافات میں) لیہ شہر کے کنارے «بَحْرَةُ الرُّغَاءِ» ”بحرۃ الرغاء“ کے مقام پر سکونت پذیر تھا۔ راوی نے کہا کہ ”قاتل اور مقتول ان میں سے تھے۔“ یہ الفاظ محمود بن خالد کے ہیں، جس نے وضاحت سے «بَحْرَةُ الرُّغَاءِ» ”بحرۃ الرغاء“ اور «شَطُّ لِيَّةَ» ”شط لیہ“ کے الفاظ بیان کیے ہیں۔ [سنن ابي داود/كتاب الديات /حدیث: 4522]

سیدنا سہل بن ابو حثمہ رضی اللہ عنہ نے بیان کیا کہ ان کی قوم کے کچھ لوگ خیبر گئے اور وہاں جا کر علیحدہ علیحدہ ہو گئے۔ پھر انہوں نے اپنے میں سے ایک کو پایا کہ اسے قتل کر دیا گیا تھا، تو انہوں نے وہاں کے لوگوں سے کہا جہاں قتل ہوا تھا کہ ”تم نے ہمارے ساتھی کو قتل کیا ہے۔“ انہوں نے کہا: ”ہم نے اس کو قتل نہیں کیا اور نہ ہمیں اس کے قاتل کی خبر ہے۔“ چنانچہ ہم اللہ کے نبی صلی اللہ علیہ وسلم کی خدمت میں آ گئے۔ تو آپ صلی اللہ علیہ وسلم نے فرمایا: ”تم لوگ اس کے قاتل کے متعلق گواہ پیش کرو۔“ انہوں نے کہا: ”ہمارے پاس کوئی گواہ نہیں ہے۔“ آپ صلی اللہ علیہ وسلم نے فرمایا: ”تب وہ تمہارے جواب میں قسمیں کھائیں گے؟“ انہوں نے کہا: ”ہم یہودیوں کی قسموں پر راضی نہیں ہیں۔“ تب رسول اللہ صلی اللہ علیہ وسلم نے ناپسند کیا کہ اس مقتول کا خون ضائع جائے تو صدقہ کے اونٹوں میں سے اس کی دیت سو اونٹنیاں ادا فرما دیں۔ [سنن ابي داود/كتاب الديات /حدیث: 4523]