سیدنا رافع بن خدیج رضی اللہ عنہ نے بیان کیا کہ انصاریوں کا ایک آدمی خیبر میں قتل ہو گیا، تو اس کے وارث نبی کریم صلی اللہ علیہ وسلم کے ہاں گئے اور اس مقتول کا ذکر کیا۔ آپ صلی اللہ علیہ وسلم نے فرمایا: ”کیا تمہارے پاس دو گواہ ہیں جو تمہارے اس ساتھی کے قتل کے متعلق گواہی دیں؟“ انہوں نے کہا: ”اے اللہ کے رسول! وہاں مسلمانوں میں سے کوئی بھی نہ تھا، اور وہ لوگ یہودی ہیں، وہ اس سے بھی بڑی باتوں کی جرأت کر سکتے ہیں۔“ آپ صلی اللہ علیہ وسلم نے فرمایا: ”تو ان میں سے پچاس آدمیوں کو منتخب کر لو اور ان سے قسمیں لے لو۔“ مگر انہوں نے انکار کر دیا، تب رسول اللہ صلی اللہ علیہ وسلم نے اپنی طرف سے اس کی دیت ادا فرمائی۔ [سنن ابي داود/كتاب الديات /حدیث: 4524]

سیدنا عبدالرحمٰن بن بجید رضی اللہ عنہ نے کہا: ”اللہ کی قسم! بیشک سہل کو اس حدیث (کے بیان کرنے) میں وہم ہوا ہے۔“ رسول اللہ صلی اللہ علیہ وسلم نے یہود کو یہ لکھا تھا کہ ”بلاشبہ تم میں مقتول پایا گیا ہے، لہٰذا اس کی دیت ادا کرو۔“ تو انہوں نے لکھا اور (اپنی تحریر میں) اللہ کے نام کی پچاس قسمیں کھائیں کہ ”ہم نے اس کو قتل نہیں کیا اور نہ ہمیں قاتل کا کوئی علم ہے۔“ انہوں نے کہا: پس رسول اللہ صلی اللہ علیہ وسلم نے اس کی دیت ایک سو اونٹنیاں اپنی طرف سے ادا فرما دی۔ [سنن ابي داود/كتاب الديات /حدیث: 4525]

جناب ابوسلمہ بن عبدالرحمٰن اور سلیمان بن یسار، انصار کے کئی لوگوں سے روایت کرتے ہیں کہ نبی کریم صلی اللہ علیہ وسلم نے یہودیوں سے کہا اور ان ہی سے ابتدا کی: ”تم میں سے پچاس آدمی قسمیں کھائیں۔“ مگر انہوں نے انکار کر دیا۔ تو آپ صلی اللہ علیہ وسلم نے انصاریوں سے کہا: ”اپنا حق (قسمیں کھا کر) ثابت کرو۔“ تو انہوں نے کہا: ”اے اللہ کے رسول! ہم ان دیکھی بات پر کیسے قسمیں کھائیں؟“ تو رسول اللہ صلی اللہ علیہ وسلم نے اس کی دیت یہودیوں پر ڈال دی کیونکہ وہ مقتول ان ہی کے ہاں پایا گیا تھا۔ [سنن ابي داود/كتاب الديات /حدیث: 4526]

سیدنا انس رضی اللہ عنہ سے روایت ہے کہ ایک لڑکی پائی گئی کہ اس کا سر دو پتھروں میں رکھ کر کچل دیا گیا تھا (اور ابھی اس میں زندگی کی رمق باقی تھی) تو اس سے پوچھا گیا: ”یہ تیرے ساتھ کس نے کیا ہے؟ کیا فلاں نے؟ کیا فلاں نے؟“ حتیٰ کہ ایک یہودی کا نام لیا گیا تو اس نے اپنے سر سے اشارہ کیا۔ (ہاں) تو اس یہودی کو پکڑا گیا اور پھر اس نے اعتراف کر لیا تو نبی کریم صلی اللہ علیہ وسلم نے حکم دیا کہ ”اس کا سر بھی پتھروں سے کچلا جائے۔“ [سنن ابي داود/كتاب الديات /حدیث: 4527]

سیدنا انس رضی اللہ عنہ سے روایت ہے کہ ایک یہودی نے ایک انصاری لڑکی کو قتل کر دیا جو کچھ زیور پہنے ہوئے تھی، اور پھر ایک کنویں میں پھینک دیا اور اس کا سر پتھر سے کچل دیا۔ پھر اسے پکڑ لیا گیا تو اسے نبی کریم صلی اللہ علیہ وسلم کے پاس لایا گیا تو آپ صلی اللہ علیہ وسلم نے اس کے متعلق حکم دیا کہ ”اسے سنگسار کیا جائے حتیٰ کہ مر جائے۔“ چنانچہ اسے سنگسار کیا گیا، حتیٰ کہ وہ مر گیا۔ امام ابوداؤد رحمہ اللہ فرماتے ہیں کہ ”اس روایت کو ابن جریح نے ایوب سے اسی کی مانند روایت کیا ہے۔“ [سنن ابي داود/كتاب الديات /حدیث: 4528]

سیدنا انس رضی اللہ عنہ سے روایت ہے کہ ایک لڑکی اپنے چاندی کے زیور پہنے ہوئے تھی کہ ایک یہودی نے پتھر سے اس کا سر کچل دیا۔ تو رسول اللہ صلی اللہ علیہ وسلم اس لڑکی کے پاس آئے جب کہ (ابھی) اس میں زندگی کی رمق باقی تھی۔ آپ صلی اللہ علیہ وسلم نے اس سے پوچھا: ”تجھے کس نے قتل کیا ہے؟ کیا فلاں نے قتل کیا ہے؟“ اس نے اپنے سر سے اشارہ کیا: ”نہیں۔“ آپ صلی اللہ علیہ وسلم نے پوچھا: ”تجھے کس نے قتل کیا ہے، کیا فلاں نے قتل کیا ہے؟“ اس نے اپنے سر سے اشارہ کیا: ”نہیں۔“ آپ صلی اللہ علیہ وسلم نے پوچھا: ”کیا فلاں نے تجھے قتل کیا ہے؟“ اس نے اپنے سر سے اشارہ کیا: ”ہاں۔“ رسول اللہ صلی اللہ علیہ وسلم نے اس کے متعلق حکم دیا تو اسے دو پتھروں میں رکھ کر قتل کیا گیا۔ [سنن ابي داود/كتاب الديات /حدیث: 4529]

سیدنا قیس بن عباد رضی اللہ عنہ سے روایت ہے، انہوں نے کہا کہ میں اور اشتر سیدنا علی رضی اللہ عنہ کے ہاں گئے اور ان سے پوچھا: ”کیا رسول اللہ صلی اللہ علیہ وسلم نے آپ کو کوئی خاص وصیت فرمائی ہے جو عام لوگوں سے نہ کہی ہو؟“ انہوں نے فرمایا: ”نہیں، سوائے اس کے جو میرے پاس اس مکتوب میں ہے۔“ مسدد کہتے ہیں کہ پھر انہوں نے وہ تحریر نکالی۔ امام احمد بن حنبل رحمہ اللہ نے کہا: انہوں نے اپنی تلوار کی میان میں سے وہ تحریر نکالی، تو اس میں تھا: ”تمام اہل ایمان کے خون برابر ہیں اور وہ اپنے علاوہ کے مقابلے میں ایک ہاتھ ہیں (ایک دوسرے کی مدد کرنے کے پابند ہیں)۔ ان کے ذمے اور امان کا ان کا ادنیٰ سے ادنیٰ آدمی بھی پابند ہے۔ خبردار! کسی مومن کو کسی کافر کے بدلے میں اور کسی امان والے کو اس کے ایام امان میں قتل نہ کیا جائے، جس نے دین میں کوئی نیا کام کیا (بدعت ایجاد کی) تو اس کا وبال اس کی اپنی جان پر ہے، جس نے کوئی بدعت ایجاد کی یا کسی بدعتی کو جگہ دی تو اس پر اللہ کی، فرشتوں کی اور تمام لوگوں کی لعنت ہو۔“ مسدد نے بواسطہ ابن ابوعروبہ (یوں) روایت کیا: پھر سیدنا علی رضی اللہ عنہ نے وہ تحریر نکالی۔ [سنن ابي داود/كتاب الديات /حدیث: 4530]

سیدنا عمرو بن شعیب اپنے والد سے، وہ اپنے دادا رضی اللہ عنہ سے روایت کرتے ہیں کہ رسول اللہ صلی اللہ علیہ وسلم نے فرمایا اور مذکورہ بالا روایت سیدنا علی رضی اللہ عنہ کی مانند ذکر کی، اس میں اضافہ ہے: ”ان کا (مسلمانوں کا) بعید ترین فرد بھی امان دے سکتا ہے، اور ان کا تنومند اور قوی رفتار اپنے ضعیف اور سست رفتار کو بھی ساتھ ملائے (مال غنیمت میں اس کو شریک کرے) اور چھوٹے دستے میں جانے والا بڑے لشکر میں رہ جانے والوں کو بھی شریک سمجھے۔“ [سنن ابي داود/كتاب الديات /حدیث: 4531]

سیدنا ابوہریرہ رضی اللہ عنہ سے روایت ہے کہ سیدنا سعد بن عبادہ رضی اللہ عنہ نے کہا: ”اے اللہ کے رسول! اگر کوئی شخص اپنی بیوی کے ساتھ کسی غیر مرد کو دیکھے تو کیا اسے قتل کر ڈالے؟“ رسول اللہ صلی اللہ علیہ وسلم نے فرمایا: ”نہیں۔“ سیدنا سعد رضی اللہ عنہ بولے: ”کیوں نہیں، قسم اس ذات کی جس نے آپ کو حق کے ساتھ عزت دی!“ نبی کریم صلی اللہ علیہ وسلم نے فرمایا: ”اپنے سردار کی بات سنو، کیا کہہ رہا ہے۔“ عبدالوہاب کی روایت میں ہے: ”سنو سعد کیا کہہ رہا ہے۔“ (یعنی بہت ہی غیرت مند ہیں۔) [سنن ابي داود/كتاب الديات /حدیث: 4532]

سیدنا ابوہریرہ رضی اللہ عنہ سے روایت ہے کہ سیدنا سعد بن عبادہ رضی اللہ عنہ نے رسول اللہ صلی اللہ علیہ وسلم سے کہا: ”فرمائیے کہ اگر میں اپنی بیوی کے ساتھ کسی غیر آدمی کو پاؤں تو کیا اسے چھوڑ دوں حتیٰ کہ چار گواہ لاؤں؟“ آپ صلی اللہ علیہ وسلم نے فرمایا: ”ہاں۔“ [سنن ابي داود/كتاب الديات /حدیث: 4533]