حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”اے ام سلمہ! مجھے عائشہ کی بابت تکلیف نہ دو۔ اللہ کی قسم! اس کے علاوہ تم میں سے کسی کے لحاف میں مجھے وحی نہیں آئی۔“ [سنن نسائي/كتاب عشرة النساء/حدیث: 3401]

حضرت ام سلمہ رضی اللہ عنہا سے روایت ہے کہ نبی صلی اللہ علیہ وسلم کی بیویوں نے مجھ سے کہا کہ تم نبی صلی اللہ علیہ وسلم سے بات کرو کہ لوگ قصداً حضرت عائشہ رضی اللہ عنہا کی باری کے دن آپ صلی اللہ علیہ وسلم کو تحفے بھیجتے ہیں۔ آپ صلی اللہ علیہ وسلم سے کہو کہ حضرت عائشہ رضی اللہ عنہا کی طرح ہم بھی اس فضیلت کی خواہش مند ہیں۔ میں نے اس بارے میں آپ صلی اللہ علیہ وسلم سے بات کی۔ آپ صلی اللہ علیہ وسلم نے کوئی جواب نہ دیا۔ جب آپ صلی اللہ علیہ وسلم باری کے لحاظ سے میرے پاس آئے تو میں نے پھر بات کی۔ آپ صلی اللہ علیہ وسلم نے پھر جواب نہ دیا۔ ازواجِ مطہرات نے مجھ سے پوچھا: آپ نے کیا جواب دیا؟ میں نے کہا: کچھ بھی نہیں۔ وہ کہنے لگیں: تم آپ صلی اللہ علیہ وسلم سے بار بار یہ بات کرتی رہو حتیٰ کہ آپ صلی اللہ علیہ وسلم جواب دیں۔ جب آپ صلی اللہ علیہ وسلم دوبارہ میرے پاس آئے تو میں نے پھر یہی بات کہی۔ آپ صلی اللہ علیہ وسلم نے فرمایا: ”(ام سلمہ!) مجھے عائشہ کے بارے میں ستایا نہ کرو کیونکہ جب میں تم میں سے کسی کے لحاف میں ہوتا ہوں تو عائشہ کے لحاف کے سوا مجھ پر کوئی وحی نہیں اتری۔“ ابو عبدالرحمن (امام نسائی رحمہ اللہ) بیان کرتے ہیں کہ راوی عبدہ سے مروی یہ دونوں حدیثیں صحیح ہیں۔ [سنن نسائي/كتاب عشرة النساء/حدیث: 3402]

حضرت عائشہ رضی اللہ عنہا فرماتی ہیں کہ لوگ قصداً اپنے تحفے عائشہ رضی اللہ عنہا کی باری کے دن بھیجا کرتے تھے، اس سے ان کا مقصود رسول اللہ صلی اللہ علیہ وسلم کی خوشی اور رضا مندی کا حصول تھا۔ [سنن نسائي/كتاب عشرة النساء/حدیث: 3403]

حضرت عائشہ رضی اللہ عنہا سے مروی ہے کہ ایک دفعہ اللہ تعالیٰ نے نبی صلی اللہ علیہ وسلم کی طرف وحی نازل فرمائی، میں بھی آپ کے ساتھ تھی، میں اٹھ گئی اور درمیان والا دروازہ بند کر دیا، جب آپ سے وحی کی شدت دور ہوئی تو آپ صلی اللہ علیہ وسلم نے فرمایا: ”اے عائشہ! جبریل تجھے سلام کہہ رہے ہیں۔“ [سنن نسائي/كتاب عشرة النساء/حدیث: 3404]

حضرت عائشہ رضی اللہ عنہا سے روایت ہے کہ نبی صلی اللہ علیہ وسلم نے مجھے فرمایا: ”جبریل علیہ السلام تجھے سلام کہہ رہے ہیں۔“ میں نے جواباً کہا: «وَرَحْمَةُ اللّٰهِ وَبَرَكَاتُهُ» ”ان پر بھی سلامتی، رحمتیں اور برکتیں ہوں۔“ آپ وہ کچھ دیکھتے ہیں جو ہم نہیں دیکھتے۔ [سنن نسائي/كتاب عشرة النساء/حدیث: 3405]

حضرت عائشہ رضی اللہ عنہا سے منقول ہے کہ رسول اللہ صلی اللہ علیہ وسلم نے فرمایا: ”عائشہ! یہ جبریل ہیں اور تجھے سلام کہہ رہے ہیں۔“ مذکورہ بالا روایت کی طرح۔ ابوعبدالرحمن (امام نسائی رحمہ اللہ) نے فرمایا: یہ روایت صحیح ہے، اس سے پہلی روایت خطا ہے۔ [سنن نسائي/كتاب عشرة النساء/حدیث: 3406]

حضرت انس رضی اللہ عنہ سے مروی ہے کہ نبی اکرم صلی اللہ علیہ وسلم ایک ام المؤمنین کے پاس تھے تو دوسری ام المؤمنین نے ایک پیالے میں کوئی خوردنی چیز بھیجی۔ چنانچہ اس (پہلی ام المؤمنین) نے قاصد کے ہاتھ پر ضرب لگائی تو پیالہ گر کر ٹوٹ گیا۔ نبی صلی اللہ علیہ وسلم نے دونوں ٹکڑے اٹھائے، ایک کو دوسرے کے ساتھ جوڑا اور کھانا اکٹھا کر کے اس میں ڈالنے لگے اور فرما رہے تھے: ”تمہاری ماں کو غیرت آگئی، کھاؤ۔“ سب نے مل کر کھانا کھایا، پھر توڑنے والی ام المؤمنین اپنا پیالہ لائیں۔ آپ صلی اللہ علیہ وسلم نے صحیح پیالہ قاصد کو دے دیا اور ٹوٹا ہوا توڑنے والی کے گھر رہنے دیا۔ [سنن نسائي/كتاب عشرة النساء/حدیث: 3407]

حضرت ام سلمہ رضی اللہ عنہا سے روایت ہے کہ وہ رسول اللہ صلی اللہ علیہ وسلم اور آپ کے صحابہ کے لیے اپنے پیالے میں کوئی کھانا لے کر (حضرت عائشہ رضی اللہ عنہا کے گھر) آئیں۔ حضرت عائشہ رضی اللہ عنہا ایک چادر اوڑھے ہوئے آئیں۔ ان کے ہاتھ میں ایک چھوٹا سا پتھر تھا۔ انہوں نے اس پتھر سے پیالہ توڑ دیا۔ نبی صلی اللہ علیہ وسلم نے پیالے کے دونوں ٹکڑوں کو جوڑا اور آپ فرما رہے تھے: ”کھانا کھاؤ، تمہاری ماں کو غصہ آ گیا۔“ آپ نے دو دفعہ فرمایا۔ پھر آپ نے حضرت عائشہ رضی اللہ عنہا کا پیالہ لے کر حضرت ام سلمہ رضی اللہ عنہا کے گھر بھیج دیا اور حضرت ام سلمہ رضی اللہ عنہا کا (ٹوٹا ہوا) پیالہ حضرت عائشہ رضی اللہ عنہا کو دے دیا۔ [سنن نسائي/كتاب عشرة النساء/حدیث: 3408]

حضرت عائشہ رضی اللہ عنہا فرماتی ہیں کہ میں نے کوئی عورت حضرت صفیہ رضی اللہ عنہا جیسا کھانا پکانے والی نہیں دیکھی۔ ایک دفعہ انہوں نے کھانا تیار کر کے ایک برتن میں رسول اللہ صلی اللہ علیہ وسلم کی طرف (میرے گھر) بھیج دیا۔ میں اپنے آپ پر ضبط نہ کر سکی، میں نے وہ برتن توڑ دیا، پھر میں نے نبی صلی اللہ علیہ وسلم سے اس (برتن توڑنے) کا کفارہ پوچھا تو آپ نے فرمایا: «إِنَاءٌ كَإِنَاءٍ وَطَعَامٌ كَطَعَامٍ» ”برتن جیسا برتن اور کھانے جیسا کھانا۔“ [سنن نسائي/كتاب عشرة النساء/حدیث: 3409]

حضرت عائشہ رضی اللہ عنہا سے مروی ہے کہ رسول اللہ صلی اللہ علیہ وسلم حضرت زینب بنت جحش رضی اللہ عنہا کے پاس (کچھ زیادہ دیر) ٹھہرتے تھے کہ ان کے پاس شہد پیتے تھے۔ میں نے اور حضرت حفصہ رضی اللہ عنہا نے منصوبہ بنایا کہ ہم میں سے جس کے پاس بھی رسول اللہ صلی اللہ علیہ وسلم تشریف لائیں وہ کہہ دے: میں آپ سے مغافیر کی بو پاتی ہوں۔ کیا آپ نے مغافیر کھایا ہے؟ پھر آپ صلی اللہ علیہ وسلم ان دونوں میں سے کسی کے گھر تشریف لے گئے تو اس نے یہی کچھ آپ سے کہہ دیا۔ آپ صلی اللہ علیہ وسلم نے فرمایا: ”نہیں، بلکہ میں نے زینب بنت جحش کے ہاں سے شہد پیا ہے، دوبارہ نہیں پیوں گا۔“ پھر آپ صلی اللہ علیہ وسلم پر یہ آیت اتری: ﴿يَا أَيُّهَا النَّبِيُّ لِمَ تُحَرِّمُ مَا أَحَلَّ اللَّهُ لَكَ﴾ [سورة التحريم: 1] ”اے نبی! آپ اس چیز کو کیوں حرام کرتے ہیں جسے اللہ تعالیٰ نے آپ کے لیے حلال رکھا ہے۔“ آگے فرمایا: ﴿إِنْ تَتُوبَا إِلَى اللَّهِ﴾ [سورة التحريم: 4] ”اگر تم توبہ کرو... الخ۔“ اس سے عائشہ اور حفصہ رضی اللہ عنہما مراد ہیں۔ اور: ﴿وَإِذْ أَسَرَّ النَّبِيُّ إِلَى بَعْضِ أَزْوَاجِهِ حَدِيثًا﴾ [سورة التحريم: 3] ”جب نبی صلی اللہ علیہ وسلم نے ایک بیوی سے راز کی بات فرمائی۔“ اس سے مراد آپ صلی اللہ علیہ وسلم کا فرمان: ”بلکہ میں نے شہد پیا ہے... الخ“ ہے۔ [سنن نسائي/كتاب عشرة النساء/حدیث: 3410]