حضرت انس بن مالک رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم نے فرمایا: ”آسانی کرو، تنگی میں نہ ڈالو، لوگوں کو تسلی دو اور ان کے لیے نفرت کی فضا پیدا نہ کرو۔“ [صحيح البخاري/كتاب الأدب/حدیث: 6125]

حضرت عائشہ رضی اللہ عنہا سے روایت ہے، انہوں نے فرمایا: ”رسول اللہ صلی اللہ علیہ وسلم کو جب کبھی دو کاموں کے درمیان اختیار دیا جاتا تو آپ ان دونوں میں سے آسان کام کو اختیار فرماتے، بشرطیکہ وہ گناہ نہ ہوتا۔ اگر اس میں گناہ کا کوئی پہلو ہوتا تو آپ صلی اللہ علیہ وسلم اس سے سب لوگوں کی نسبت سب سے زیادہ دور رہنے والے ہوتے، نیز رسول اللہ صلی اللہ علیہ وسلم نے اپنی ذاتِ کریمہ کے لیے کبھی کسی سے کوئی انتقام نہیں لیا، البتہ اگر اللہ کی حرمت کو پامال کیا جاتا تو محض اللہ کی رضا کے لیے اس کا انتقام لیتے تھے۔“ [صحيح البخاري/كتاب الأدب/حدیث: 6126]

حضرت ازرق بن قیس رحمہ اللہ سے روایت ہے، انہوں نے کہا کہ ہم اہواز شہر میں ایک نہر کے کنارے پر تھے جو خشک پڑی تھی۔ وہاں حضرت ابو برزہ اسلمی رضی اللہ عنہ گھوڑے پر سوار ہو کر آئے اور نماز پڑھنے لگے اور گھوڑے کو چھوڑ دیا۔ گھوڑا بھاگنے لگا تو انہوں نے نماز توڑ دی اور اس کا پیچھا کیا حتیٰ کہ اسے پکڑ لیا، پھر واپس آئے اور نماز ادا کی۔ ہم میں سے ایک آدمی تھا جو خارجیوں کا عقیدہ رکھتا تھا، وہ آیا اور کہنے لگا: ”اس بوڑھے کو دیکھو، اس نے گھوڑے کی وجہ سے نماز چھوڑ دی۔“ حضرت ابو برزہ اسلمی رضی اللہ عنہ نے فرمایا: ”جب سے میں رسول اللہ صلی اللہ علیہ وسلم سے جدا ہوا ہوں، کسی نے مجھے ایسی سخت بات نہیں کہی۔“ مزید فرمایا کہ ”میرا گھر دور ہے۔ اگر میں نماز پڑھتا رہتا اور گھوڑے کو چھوڑ دیتا تو اپنے گھر رات تک بھی نہ پہنچ پاتا۔“ اور کہا کہ ”میں نبی صلی اللہ علیہ وسلم کی صحبت میں رہا ہوں، میں نے آپ صلی اللہ علیہ وسلم کو آسانی کی صورت اختیار کرتے ہوئے دیکھا ہے۔“ [صحيح البخاري/كتاب الأدب/حدیث: 6127]

حضرت ابوہریرہ رضی اللہ عنہ سے روایت ہے کہ ایک دیہاتی نے مسجد میں پیشاب کر دیا، تو لوگ اسے زجر و توبیخ کرنے کے لیے اس کی طرف بڑھے تو رسول اللہ صلی اللہ علیہ وسلم نے انہیں فرمایا: ”اسے چھوڑ دو اور اس کے پیشاب پر پانی کا ایک ڈول بہا دو، تم تو صرف آسانی کرنے والے بنا کر بھیجے گئے ہو، تم تنگی کرنے والے بنا کر نہیں بھیجے گئے۔“ [صحيح البخاري/كتاب الأدب/حدیث: 6128]

حضرت انس بن مالک رضی اللہ عنہ سے روایت ہے، انہوں نے کہا کہ نبی صلی اللہ علیہ وسلم ہم میں گھل مل جاتے تھے یہاں تک کہ میرے چھوٹے بھائی سے فرماتے: ”اے ابو عمیر! تیری نغیر نامی چڑیا نے کیا کیا؟“ [صحيح البخاري/كتاب الأدب/حدیث: 6129]

حضرت عائشہ رضی اللہ عنہا سے روایت ہے، انہوں نے کہا کہ ”میں نبی صلی اللہ علیہ وسلم کی موجودگی میں گڑیوں سے کھیلا کرتی تھی۔ میری بہت سی سہلیاں تھیں جو میرے ساتھ کھیلا کرتی تھیں، جب رسول اللہ صلی اللہ علیہ وسلم گھر داخل ہوتے تو وہ چھپ جاتیں، آپ صلی اللہ علیہ وسلم انہیں میرے پاس بھیجتے، پھر وہ میرے ساتھ کھیل میں مصروف ہو جاتیں۔“ [صحيح البخاري/كتاب الأدب/حدیث: 6130]

حضرت عائشہ رضی اللہ عنہا سے روایت ہے، انہوں نے بتایا کہ ایک آدمی نے نبی صلی اللہ علیہ وسلم سے اندر آنے کی اجازت طلب کی تو آپ نے فرمایا: ”اسے اجازت دے دو، یہ اپنی قوم کا انتہائی برا آدمی ہے۔“ جب وہ اندر آیا تو آپ نے اس کے ساتھ بڑی نرمی سے گفتگو فرمائی۔ میں نے کہا: ”اللہ کے رسول! آپ نے اس کے متعلق کیا فرمایا تھا، پھر اتنی نرمی کے ساتھ گفتگو فرمائی؟“ آپ نے فرمایا: ”اے عائشہ! اللہ کے نزدیک مرتبے کے اعتبار سے بد ترین شخص وہ ہے جسے لوگ اس کی بد زبانی سے محفوظ رہنے کے لیے چھوڑ دیں۔“ [صحيح البخاري/كتاب الأدب/حدیث: 6131]

حضرت عبداللہ بن ابی ملیکہ رحمہ اللہ سے روایت ہے کہ نبی صلی اللہ علیہ وسلم کو ریشمی کوٹ بطور ہدیہ پیش کیے گئے جنہیں سونے کے بٹن لگے ہوئے تھے۔ آپ صلی اللہ علیہ وسلم نے وہ کوٹ اپنے صحابہ کرام رضی اللہ عنہم میں تقسیم کر دیے اور ان میں سے ایک حضرت مخرمہ رضی اللہ عنہ کے لیے علیحدہ کر لیا۔ جب حضرت مخرمہ رضی اللہ عنہ آئے تو آپ صلی اللہ علیہ وسلم نے فرمایا: ”میں نے تیرے لیے یہ کوٹ چھپا رکھا تھا۔“ (راویِ حدیث) ایوب نے کہا کہ آپ صلی اللہ علیہ وسلم نے وہ کوٹ اپنے کپڑے میں چھپا رکھا تھا اور اسے سونے کے بٹن دکھا رہے تھے کیونکہ وہ ذرا سخت مزاج آدمی تھے۔ اس حدیث کو حماد بن زید نے بھی ایوب کے واسطے سے روایت کیا ہے۔ حاتم بن وردان نے کہا: ہمیں ایوب نے ابن ابی ملیکہ سے بیان کیا، انہوں نے حضرت مسور رضی اللہ عنہ سے روایت کیا کہ نبی صلی اللہ علیہ وسلم کے پاس چند کوٹ بطور تحفہ آئے۔۔۔۔ (پھر اسی طرح حدیث بیان کی)۔ [صحيح البخاري/كتاب الأدب/حدیث: 6132]