سیدنا جابر رضی اللہ عنہ کہتے ہیں: نبی صلی اللہ علیہ وسلم کی طرف ایک آدمی کا مقدمہ پیش ہوا جس نے کسی کو اس کی ران پر ایک سینگ مارا، جس سے اس کی ران زخمی ہو گئی، اس نے کہا: یا رسول اللہ! مجھے قصاص دیجیے۔ آپ صلی اللہ علیہ وسلم نے فرمایا: ”اس کا علاج کرو، اور کچھ دیر ٹھہرو یہاں تک کہ ہم دیکھیں کہ یہ زخم کدھر جاتا ہے۔“ اس نے کہا: یا رسول اللہ! مجھے قصاص لے دیجیے، آپ صلی اللہ علیہ وسلم نے اس کو پھر یہی بات فرمائی تو وہ شخص کہنے لگا: یا رسول اللہ! مجھے قصاص لے دیجیے، تو آپ نے اس کو قصاص لے دیا، تو اس کی ٹانگ سوج گئی اور جس سے قصاص لیا گیا تھا اس کی ٹانگ ٹھیک ہو گئی۔ تو نبی صلی اللہ علیہ وسلم نے اس کی دیت باطل کر دی۔ [معجم صغير للطبراني/كتاب الدية/حدیث: 1186]

سیدنا ابن عباس رضی اللہ عنہما کہتے ہیں کہ نبی صلی اللہ علیہ وسلم نے فرمایا: ”مکاتب کی دیت اتنی آزاد کے برابر ہو گی جتنا وہ آزاد ہو چکا ہو۔ اور جتنا وہ غلام ہے اتنی دیت اس کی غلام کی ہو گی۔“ [معجم صغير للطبراني/كتاب الدية/حدیث: 1187]