حضرت عبادہ بن صامت رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے ہمیں فرمایا جبکہ ہم ایک مجلس میں موجود تھے: ”تم میری اس شرط پر بیعت کرو کہ اللہ کے ساتھ کسی کو شریک نہیں ٹھہراؤ گے، چوری نہیں کرو گے، زنا نہیں کرو گے، اپنی اولاد کو قتل نہیں کرو گے، کسی پر ایسا کوئی بہتان نہیں لگاؤ گے جو تم نے اپنے ہاتھوں اور پاؤں سے گھڑا ہو گا اور اچھے کاموں میں نافرمانی نہیں کرو گے۔ تم میں سے جس کسی نے اس عہد کو پورا کیا اس کا ثواب اللہ کے ذمے ہے اور جس نے ان کاموں میں سے کسی کا ارتکاب کیا اور اسے دنیا میں اس کی سزا مل گئی تو یہ اس کے لیے کفارہ ہو گا۔ اور جس نے ان میں سے کوئی برا کام کیا، پھر اللہ تعالیٰ نے اس پر پردہ ڈالا تو اس کا معاملہ اللہ کے سپرد ہے، چاہے تو اسے سزا دے اور چاہے تو اسے معاف کر دے۔“ چنانچہ ہم نے آپ صلی اللہ علیہ وسلم کی اس شرط پر بیعت کی۔ [صحيح البخاري/كتاب الأحكام/حدیث: 7213]

حضرت عائشہ رضی اللہ عنہا سے روایت ہے، انہوں نے بیان کیا کہ ”نبی صلی اللہ علیہ وسلم عورتوں سے زبانی طور پر اس آیت ﴿أَن لَّا يُشْرِكْنَ بِاللَّهِ شَيْئًا﴾ [سورة الممتحنة: 12] کے احکام پر بیعت لیتے تھے کہ وہ اللہ کے ساتھ کسی چیز کو شریک نہیں ٹھہرائیں گی۔“ نیز انہوں نے فرمایا: ”رسول اللہ صلی اللہ علیہ وسلم کے ہاتھ کو کبھی کسی عورت کے ہاتھ نے نہیں چھوا، سوائے اس عورت کے جس کے آپ مالک تھے۔“ [صحيح البخاري/كتاب الأحكام/حدیث: 7214]

حضرت ام عطیہ رضی اللہ عنہا سے روایت ہے، انہوں نے کہا: ”ہم نے نبی صلی اللہ علیہ وسلم کی بیعت کی تو آپ نے ہم پر یہ آیت پڑھی: ﴿أَنْ لَا يُشْرِكْنَ بِاللَّهِ شَيْئًا﴾ [سورة الممتحنة: 12] ”وہ اللہ کے ساتھ کسی چیز کو شریک نہیں ٹھہرائیں گی“ اور آپ نے ہمیں نوحہ کرنے سے منع فرمایا تو ہم میں سے ایک عورت نے اپنا ہاتھ پیچھے کر لیا اور کہا: ”فلاں عورت نے (نوحہ کرنے میں) میری مدد کی تھی اور میں اسے اس کا بدلہ دینا چاہتی ہوں۔“ اس پر آپ صلی اللہ علیہ وسلم نے کچھ نہ کہا تو وہ گئی پھر واپس آئی۔ (میرے ساتھ بیعت کرنے والی عورتوں میں سے) کسی عورت نے اس بیعت کو پورا نہ کیا سوائے ام سلیم، ام علاء اور ابوسبرہ کی بیٹی جو معاذ رضی اللہ عنہ کی بیوی تھیں، یا ابوسبرہ کی بیٹی اور معاذ رضی اللہ عنہ کی بیوی کے۔“ [صحيح البخاري/كتاب الأحكام/حدیث: 7215]

حضرت جابر رضی اللہ عنہ سے روایت ہے، انہوں نے کہا کہ ایک دیہاتی نے نبی صلی اللہ علیہ وسلم کی خدمت میں حاضر ہو کر عرض کی: ”آپ مجھے اسلام پر بیعت کر لیں“، آپ صلی اللہ علیہ وسلم نے اسے اسلام پر بیعت کر لیا۔ دوسرے دن وہ بخار کی حالت میں حاضر ہوا اور کہنے لگا: ”میری بیعت واپس کر لیں۔“ آپ صلی اللہ علیہ وسلم نے انکار فرمایا۔ جب وہ واپس ہوا تو آپ صلی اللہ علیہ وسلم نے فرمایا: ”مدینہ طیبہ بھٹی کی طرح ہے جو گندگی اور ناپاکی کو دور کر دیتا ہے، خالص اور پاکیزہ کو رکھ لیتا ہے۔“ [صحيح البخاري/كتاب الأحكام/حدیث: 7216]

حضرت عائشہ رضی اللہ عنہا سے روایت ہے، انہوں نے ایک مرتبہ کہا: ”ہائے سر پھٹا جا رہا ہے۔“ رسول اللہ صلی اللہ علیہ وسلم نے فرمایا: ”اگر تم مر جاؤ اور میں زندہ رہا تو میں تمہارے لیے مغفرت مانگوں گا اور دعائے خیر کروں گا۔“ حضرت عائشہ رضی اللہ عنہا نے کہا: ”افسوس! آپ تو میری موت کے طالب ہیں اور اگر ایسا ہو گیا تو آپ دن کے آخری حصے میں ضرور کسی دوسری عورت سے شادی کر لیں گے۔“ نبی صلی اللہ علیہ وسلم نے فرمایا: ”ایسا نہیں بلکہ میں تو اپنے سر درد کا اظہار کرتا ہوں۔ میرا ارادہ ہوا تھا کہ میں ابوبکر اور ان کے بیٹے کو بلاؤں اور انہیں خلیفہ بنا دوں تاکہ کسی دعویٰ کرنے والے یا اس کی خواہش رکھنے والے کے لیے گنجائش باقی نہ رہے لیکن پھر میں نے سوچا کہ اللہ خود کسی دوسرے کی خلافت کا انکار کرے گا اور مسلمان بھی اسے دفع کریں گے۔۔۔۔۔ یا فرمایا۔۔۔۔ اللہ دفع کرے گا اور مسلمان کسی اور کو خلیفہ نہیں بننے دیں گے۔“ [صحيح البخاري/كتاب الأحكام/حدیث: 7217]

حضرت عبداللہ بن عمر رضی اللہ عنہ سے روایت ہے، انہوں نے کہا کہ حضرت عمر رضی اللہ عنہ سے کہا گیا: ”آپ کسی کو خلیفہ کیوں نہیں نامزد کر دیتے؟“ انہوں نے فرمایا: ”اگر میں کسی کو خلیفہ نامزد کرتا ہوں تو اس شخص نے خلیفہ نامزد کیا تھا جو مجھ سے بہتر تھے، یعنی ابوبکر رضی اللہ عنہ اور اگر میں اسے مسلمانوں کی رائے پر چھوڑتا ہوں تو اس بزرگ نے اسے مسلمانوں کی صوابدید پر چھوڑ دیا تھا جو مجھ سے بہت بہتر تھے، یعنی رسول اللہ صلی اللہ علیہ وسلم کی ذاتِ گرامی۔“ لوگوں نے اس موقف پر ان کی تعریف کی تو انہوں نے فرمایا: ”کوئی تو میری دل سے تعریف کرتا ہے اور کوئی ڈرتے ہوئے ایسا کرتا ہے۔ اب تو میں یہی غنیمت سمجھتا ہوں کہ خلافت کی ذمہ داریوں سے برابر برابر نجات پا جاؤں نہ مجھے اس کا کوئی ثواب ملے اور نہ مجھ سے اس کے متعلق کوئی باز پرس ہی ہو، میں نے خلافت کا بوجھ زندگی بھر اٹھایا لیکن مرتے وقت اس بار کو نہیں اٹھاؤں گا۔“ [صحيح البخاري/كتاب الأحكام/حدیث: 7218]

حضرت انس رضی اللہ عنہ سے روایت ہے، انہوں نے حضرت عمر رضی اللہ عنہ کا دوسرا خطبہ سنا جب آپ منبر پر بیٹھے ہوئے تھے۔ یہ واقعہ نبی صلی اللہ علیہ وسلم کی وفات کے دوسرے دن کا ہے۔ حضرت عمر رضی اللہ عنہ نے خطبہ پڑھا جبکہ حضرت ابوبکر رضی اللہ عنہ خاموش تھے اور کوئی بات نہ کرتے تھے، پھر حضرت عمر رضی اللہ عنہ نے کہا: ”مجھے امید تھی کہ رسول اللہ صلی اللہ علیہ وسلم زندہ رہیں گے اور ہمارے کاموں کی تدبیر و انتظام کرتے رہیں گے۔“ اس سے ان کی مراد یہ تھی کہ حضرت محمد صلی اللہ علیہ وسلم ان سب سے آخر میں وفات پائیں گے۔ ”اگر محمد صلی اللہ علیہ وسلم وفات پا چکے ہیں تو بے شک اللہ تعالیٰ نے تمہارے سامنے نور (قرآن) کو باقی رکھا ہے جس کے ذریعے سے تم ہدایت حاصل کرتے رہو گے۔ اللہ تعالیٰ نے اس کے ذریعے سے حضرت محمد صلی اللہ علیہ وسلم کی رہنمائی فرمائی۔ حضرت ابوبکر رضی اللہ عنہ رسول اللہ صلی اللہ علیہ وسلم کے ساتھی اور ﴿ثَانِيَ اثْنَيْنِ﴾ [سورة التوبة: 40] ”دو میں سے دوسرے“ ہیں۔ وہ مسلمانوں میں بہترین شخص ہیں جو تمہارے امور سرانجام دیں، لہذا اٹھو اور ان کی بیعت کرو۔“ ان میں سے ایک جماعت پہلے ہی سقیفہ بنو ساعدہ میں آپ کی بیعت کر چکی تھی۔ پھر عام لوگوں نے منبرِ نبوی پر بیعت کی۔ زہری نے حضرت انس رضی اللہ عنہ سے بیان کیا، انہوں نے حضرت عمر رضی اللہ عنہ سے سنا کہ وہ حضرت ابوبکر رضی اللہ عنہ سے اس دن کہہ رہے تھے: ”آپ منبر پر تشریف لائیں۔“ وہ ان سے مسلسل کہتے رہے یہاں تک کہ وہ تشریف لے آئے اور سب لوگوں نے آپ سے بیعت کر لی۔ [صحيح البخاري/كتاب الأحكام/حدیث: 7219]

حضرت جبیر بن مطعم رضی اللہ عنہ سے روایت ہے، انہوں نے کہا: نبی صلی اللہ علیہ وسلم کے پاس ایک خاتون آئی اور کسی معاملے کے متعلق آپ سے گفتگو کی۔ آپ صلی اللہ علیہ وسلم نے اس سے کہا کہ وہ دوبارہ آئے، اس نے کہا: ”اللہ کے رسول! اگر میں آؤں اور آپ کو نہ پاؤں تو کیا کروں؟“ اس کا اشارہ آپ کی وفات کی طرف تھا۔ آپ صلی اللہ علیہ وسلم نے فرمایا: ”اگر مجھے نہ پاؤ تو ابوبکر کے پاس چلی آنا۔“ [صحيح البخاري/كتاب الأحكام/حدیث: 7220]

حضرت طارق بن شہاب رضی اللہ عنہ سے روایت ہے کہ حضرت ابو بکر رضی اللہ عنہ نے بزاخہ کے وفد سے فرمایا تھا: ”تم لوگ اونٹوں کی دموں کے پیچھے پیچھے جنگلوں میں گھومتے رہو یہاں تک کہ اللہ تعالیٰ اپنے رسول اللہ صلی اللہ علیہ وسلم کے خلیفہ اور مہاجرین کو کوئی بات دکھا دے جس کی وجہ سے وہ تمہارا قصور معاف کر دیں۔“ [صحيح البخاري/كتاب الأحكام/حدیث: 7221]