قبیصہ بن ذُویب بیان کرتے ہیں، دادی، نانی، ابوبکر رضی اللہ عنہ کے پاس آئی اور اس نے اپنی میراث کے بارے میں آپ سے مسئلہ دریافت کیا، تو انہوں نے اس سے کہا: تمہارے لیے اللہ کی کتاب میں کوئی حصہ ہے نہ رسول اللہ صلی ‌اللہ ‌علیہ ‌وآلہ ‌وسلم کی سنت میں، آپ جائیں حتی کہ میں لوگوں سے پوچھ لوں۔ انہوں نے پوچھا تو مغیرہ بن شعبہ رضی اللہ عنہ نے فرمایا: میں رسول اللہ صلی ‌اللہ ‌علیہ ‌وآلہ ‌وسلم کی خدمت میں حاضر تھا کہ آپ صلی ‌اللہ ‌علیہ ‌وآلہ ‌وسلم نے اسے (یعنی دادی / نانی کو) چھٹا حصہ دیا، ابوبکر رضی اللہ عنہ نے فرمایا: کیا تمہارے ساتھ کوئی اور بھی ہے؟ تو محمد بن مسلمہ رضی اللہ عنہ نے بھی ویسے ہی کہا جیسے مغیرہ رضی اللہ عنہ نے کہا تھا، تو ابوبکر رضی اللہ عنہ نے اس (دادی / نانی) کے متعلق اسے نافذ کر دیا، پھر ایک اور دادی / نانی عمر رضی اللہ عنہ کے پاس آئی اور اپنی میراث کے متعلق دریافت کیا، تو انہوں نے فرمایا: وہ چھٹا حصہ ہی ہے، اگر تم دونوں اکٹھی ہوں تو وہ تم دونوں کے درمیان تقسیم ہو گا، اور تم دونوں میں سے جو بھی اکیلی ہو گی تو وہ حصہ اسے ملے گا۔ صحیح، رواہ مالک و احمد و الترمذی و ابوداؤد و الدارمی و ابن ماجہ۔ [مشكوة المصابيح/كتاب الفرائض والوصايا/حدیث: 3061]

ابن مسعود رضی اللہ عنہ اس دادی کے بارے میں جسے اپنے بیٹے کے ساتھ حصہ ملا، فرمایا: وہ پہلی دادی ہے جسے رسول اللہ صلی ‌اللہ ‌علیہ ‌وآلہ ‌وسلم نے بیٹے کی موجودگی میں چھٹا حصہ عطا کیا جبکہ اس کا بیٹا زندہ تھا۔ ترمذی، دارمی۔ امام ترمذی رحمہ اللہ نے اسے ضعیف قرار دیا ہے۔ «إِسْنَادُهُ ضَعِيفٌ، رَوَاهُ التِّرْمِذِيُّ وَالدَّارِمِيُّ» ۔ [مشكوة المصابيح/كتاب الفرائض والوصايا/حدیث: 3062]

ضحاک بن سفیان رضی اللہ عنہ سے روایت ہے کہ رسول اللہ صلی ‌اللہ ‌علیہ ‌وآلہ ‌وسلم نے ان کے نام خط لکھا کہ: ”اَشیَم الضبابی کی اہلیہ کو اس کے خاوند کی دیت سے میراث دو۔“ (ترمذی، ابوداؤد) اور امام ترمذی نے فرمایا: یہ حدیث حسن صحیح ہے۔ صحیح، «رَوَاهُ التِّرْمِذِيُّ وَأَبُو دَاوُدَ» ”اسے ترمذی اور ابوداؤد نے روایت کیا ہے“۔ [مشكوة المصابيح/كتاب الفرائض والوصايا/حدیث: 3063]

تمیم داری رضی اللہ عنہ بیان کرتے ہیں، میں نے رسول اللہ صلی ‌اللہ ‌علیہ ‌وآلہ ‌وسلم سے اہل شرک میں سے اس آدمی کے بارے میں مسئلہ دریافت کیا، جو کسی مسلمان شخص کے ہاتھوں پر اسلام قبول کر لے (کہ اس کا شرعی حکم کیا ہے)؟ تو آپ صلی ‌اللہ ‌علیہ ‌وآلہ ‌وسلم نے فرمایا: ”وہ اس کی حیات و ممات کے بارے میں تمام لوگوں سے زیادہ حق دار ہے۔“ حسن، اسے ترمذی، ابن ماجہ اور دارمی نے روایت کیا ہے۔ [مشكوة المصابيح/كتاب الفرائض والوصايا/حدیث: 3064]

عبداللہ بن عباس رضی اللہ عنہما سے روایت ہے کہ ایک آدمی فوت ہو گیا تو اس نے صرف ایک غلام چھوڑا جس کو اس نے آزاد کیا تھا، نبی صلی ‌اللہ ‌علیہ ‌وآلہ ‌وسلم نے فرمایا: ”کیا اس کا کوئی وارث ہے؟“ صحابہ کرام رضی اللہ عنہم نے عرض کیا: نہیں، صرف وہ ایک غلام ہے جسے اس نے آزاد کیا تھا، تو نبی صلی ‌اللہ ‌علیہ ‌وآلہ ‌وسلم نے اس کی میراث اس کو دے دی۔ إسناده حسن، رواہ أبوداؤد والترمذی وابن ماجہ۔ [مشكوة المصابيح/كتاب الفرائض والوصايا/حدیث: 3065]

عمرو بن شعیب اپنے والد سے اور وہ اپنے دادا رضی اللہ عنہ سے روایت کرتے ہیں، کہ نبی صلی ‌اللہ ‌علیہ ‌وآلہ ‌وسلم نے فرمایا: ”جو مال کا وارث ہو سکتا ہے وہ ولاء کا وارث ہو گا“۔ ترمذی، اور فرمایا: اس حدیث کی سند قوی نہیں۔ «سَنَدُهُ ضَعِيفٌ» ”اس کی سند ضعیف ہے“، «رَوَاهُ التِّرْمِذِيُّ» ”اسے ترمذی نے روایت کیا ہے“۔ [مشكوة المصابيح/كتاب الفرائض والوصايا/حدیث: 3066]

عبداللہ بن عمر رضی اللہ عنہما سے روایت ہے کہ رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جو میراث دور جاہلیت میں تقسیم کی گئی تو وہ جاہلیت کی تقسیم کے مطابق ہے، اور جو میراث دور اسلام میں ہوئی تو وہ اسلام کی تقسیم کے مطابق ہے۔“ حسن، رواہ ابن ماجہ۔ [مشكوة المصابيح/كتاب الفرائض والوصايا/حدیث: 3067]

محمد بن ابی بکر بن حزم رحمہ اللہ سے روایت ہے کہ انہوں نے اپنے والد سے کئی مرتبہ سنا، وہ کہا کرتے تھے: عمر بن خطاب رضی اللہ عنہ پھوپھی کے متعلق تعجب سے کہا کرتے تھے کہ بھتیجا تو اس کا وارث بنتا ہے، جبکہ وہ اس کی وارث نہیں بنتی۔ «إِسْنَادُهُ ضَعِيفٌ، رَوَاهُ مَالِكٌ» ”اس کی سند ضعیف ہے، اسے امام مالک نے روایت کیا ہے“۔ [مشكوة المصابيح/كتاب الفرائض والوصايا/حدیث: 3068]

عمر رضی اللہ عنہ نے فرمایا: فرائض (میراث کا علم) سیکھو۔ اور ابن مسعود رضی اللہ عنہ نے اتنا اضافہ کیا، طلاق اور حج (کے متعلق بھی سیکھو) ان دونوں رضی اللہ عنہما نے کہا: کیونکہ یہ تمہارے اہم دینی امور میں سے ہیں۔ «إِسْنَادُهُ ضَعِيفٌ، رَوَاهُ الدَّارِمِيُّ» ”اس کی سند ضعیف ہے، اسے دارمی نے روایت کیا ہے۔“ [مشكوة المصابيح/كتاب الفرائض والوصايا/حدیث: 3069]

ابن عمر رضی اللہ عنہما بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جو مسلمان وصیت کرنا چاہتا ہے اس کے لیے مناسب نہیں کہ وہ دو راتیں بھی یوں گزار دے کہ وصیت اس کے پاس لکھی ہوئی نہ ہو۔“ متفق علیہ۔ [مشكوة المصابيح/كتاب الفرائض والوصايا/حدیث: 3070]