جابر رضی اللہ عنہ بیان کرتے ہیں، ایک آدمی نے نبی صلی ‌اللہ ‌علیہ ‌وآلہ ‌وسلم سے غزوہ احد کے روز عرض کیا: مجھے بتائیں کہ اگر میں قتل کر دیا جاؤں تو کہاں ہوں گا؟ آپ صلی ‌اللہ ‌علیہ ‌وآلہ ‌وسلم نے فرمایا: ”جنت میں۔“ اس نے وہ کھجوریں، جو کہ اس کے ہاتھ میں تھیں، پھینک دیں، پھر قتال کیا حتیٰ کہ شہید کر دیا گیا۔ متفق علیہ۔ [مشكوة المصابيح/كتاب الجهاد/حدیث: 3937]

کعب بن مالک رضی اللہ عنہ بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم جب کسی غزوہ کا ارادہ فرماتے تو آپ اس کے علاوہ کسی اور چیز کا توریہ فرمایا کرتے تھے، لیکن جب یہ غزوہ یعنی غزوہ تبوک پیش آیا جسے رسول اللہ صلی ‌اللہ ‌علیہ ‌وآلہ ‌وسلم نے سخت گرمی میں لڑا، اور اس میں آپ کو دور دراز کا سفر، بے آب و گیاہ راستوں اور بہت زیادہ دشمنوں کا سامنا تھا، لہٰذا آپ صلی ‌اللہ ‌علیہ ‌وآلہ ‌وسلم نے مسلمانوں کے لیے ان کے معاملے کو واضح کر دیا تاکہ وہ اپنے غزوہ کے لیے خوب تیاری کر لیں، اور آپ صلی ‌اللہ ‌علیہ ‌وآلہ ‌وسلم نے جس سمت جانا تھا وہ انہیں بتا دی۔ [رواہ البخاری] [مشكوة المصابيح/كتاب الجهاد/حدیث: 3938]

جابر رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: «الْحَرْبُ خُدْعَةٌ» ”لڑائی ایک دھوکہ ہے۔“ متفق علیہ۔ [مشكوة المصابيح/كتاب الجهاد/حدیث: 3939]

انس رضی اللہ عنہ بیان کرتے ہیں کہ جب رسول اللہ صلی ‌اللہ ‌علیہ ‌وآلہ ‌وسلم جہاد کے لیے جاتے تو ام سلیم رضی اللہ عنہا اور انصار کی کچھ عورتیں آپ صلی ‌اللہ ‌علیہ ‌وآلہ ‌وسلم کے ساتھ جہاد کے لیے جاتیں، وہ پانی پلاتیں اور زخمیوں کا علاج کرتی تھیں۔ (رواہ مسلم) [مشكوة المصابيح/كتاب الجهاد/حدیث: 3940]

ام عطیہ رضی اللہ عنہا بیان کرتی ہیں، میں نے رسول اللہ صلی ‌اللہ ‌علیہ ‌وآلہ ‌وسلم کے ساتھ سات غزوات میں شرکت کی، میں ان کے سامان کے پاس رہا کرتی تھی، ان کے لیے کھانا تیار کرتی، زخمیوں کا علاج کرتی اور مریضوں کی دیکھ بھال کیا کرتی تھی۔ رواہ مسلم۔ [مشكوة المصابيح/كتاب الجهاد/حدیث: 3941]

عبداللہ بن عمر رضی اللہ عنہما بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے ”عورتوں اور بچوں کو قتل کرنے سے منع فرمایا۔“ متفق علیہ۔ [مشكوة المصابيح/كتاب الجهاد/حدیث: 3942]

صعب بن جثامہ رضی اللہ عنہ بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم سے محلوں میں رہنے والے مشرکین کے بارے میں دریافت کیا گیا جن پر شب خون مارا جائے جس میں ان کی عورتیں اور ان کے بچے ہلاک ہو جائیں، آپ صلی ‌اللہ ‌علیہ ‌وآلہ ‌وسلم نے فرمایا: ”وہ بھی انہی کے حکم میں ہیں۔“ ایک دوسری روایت میں ہے: ”وہ اپنے آبا کے تابع ہیں۔“ متفق علیہ۔ [مشكوة المصابيح/كتاب الجهاد/حدیث: 3943]

ابن عمر رضی اللہ عنہما سے روایت ہے کہ رسول اللہ صلی ‌اللہ ‌علیہ ‌وآلہ ‌وسلم نے بنو نضیر کے کھجوروں کے درخت کاٹے اور جلائے، حسان رضی اللہ عنہ نے اس کے متعلق شعر کہا: ”بنو لؤی کے سرداروں کے لیے بویرہ پر (کھجوروں کے درختوں کو) جلانا آسان ہوا جو کہ پھیلا ہوا تھا۔“ اور اس کے متعلق یہ آیت نازل ہوئی: ﴿مَا قَطَعْتُمْ مِنْ لِينَةٍ أَوْ تَرَكْتُمُوهَا قَائِمَةً عَلَى أُصُولِهَا فَبِإِذْنِ اللَّهِ﴾ [سورة الحشر: 5] ”تم نے کھجور کے جو درخت کاٹ ڈالے یا انہیں ان کے تنوں پر قائم رہنے دیا وہ (سب) اللہ کے حکم سے تھا۔“ متفق علیہ۔ [مشكوة المصابيح/كتاب الجهاد/حدیث: 3944]

عبداللہ بن عون رحمہ اللہ سے روایت ہے کہ (ابن عمر رضی اللہ عنہما کے آزاد کردہ غلام) نافع رحمہ اللہ نے انہیں خط لکھا جس میں انہوں نے انہیں (یعنی مجھے) یہ بتایا کہ ابن عمر رضی اللہ عنہما نے انہیں (یعنی نافع کو) خبر دی کہ نبی صلی ‌اللہ ‌علیہ ‌وآلہ ‌وسلم نے بنو مصطلق پر اس وقت حملہ کیا جب وہ مریسیع کے مقام پر اپنے مویشیوں میں غافل تھے، آپ صلی ‌اللہ ‌علیہ ‌وآلہ ‌وسلم نے جنگجوؤں کو قتل کیا اور بچوں کو قیدی بنایا۔ متفق علیہ۔ [مشكوة المصابيح/كتاب الجهاد/حدیث: 3945]

ابواسید رضی اللہ عنہ سے روایت ہے کہ جب غزوہ بدر کے موقع پر ہم اور قریش ایک دوسرے کے سامنے صف آرا ہوئے تو نبی صلی ‌اللہ ‌علیہ ‌وآلہ ‌وسلم نے فرمایا: ”جب وہ تمہارے قریب آ جائیں تو تم ان پر تیر برساؤ“ اور ایک دوسری روایت میں ہے کہ ”جب وہ تمہارے قریب آ جائیں تو تم ان پر تیر برساؤ اور کچھ تیر اپنے پاس محفوظ رکھو۔“ رواہ البخاری۔ اور سعد رضی اللہ عنہ سے مروی حدیث: ”تمہاری مدد نہیں کی جاتی ......“ ہم عنقریب باب فضل الفقراء میں ذکر کریں گے، اور براء رضی اللہ عنہ سے مروی حدیث ”رسول اللہ صلی ‌اللہ ‌علیہ ‌وآلہ ‌وسلم نے ایک لشکر بھیجا .....“ باب المعجزات میں ان شاء اللہ تعالیٰ ذکر کریں گے۔ [مشكوة المصابيح/كتاب الجهاد/حدیث: 3946]