جابر بن سمرہ رضی اللہ عنہما بیان کرتے ہیں، میں نے رسول اللہ صلی ‌اللہ ‌علیہ ‌وآلہ ‌وسلم کے ساتھ نمازِ اولیٰ (فجر یا ظہر) پڑھی، پھر آپ اپنے اہل خانہ کی طرف تشریف لے گئے، میں بھی آپ کے ساتھ ہی (مسجد سے) نکل آیا، راستے میں کچھ بچے آپ سے ملے تو آپ نے باری باری ان کے رخساروں پر دستِ شفقت پھیرا جبکہ آپ نے میرے دونوں رخساروں پر دستِ شفقت پھیرا۔ میں نے آپ صلی ‌اللہ ‌علیہ ‌وآلہ ‌وسلم کے دستِ مبارک کی ٹھنڈک اور خوشبو ایسی محسوس کی گویا آپ نے اسے عطار کے ڈبے سے نکالا ہے۔ رواہ مسلم۔ جابر رضی اللہ عنہ سے مروی حدیث: «سَمُّوا بِاسْمِي» ”میرے نام پر نام رکھو“ ”باب الاسامی“ میں اور سائب بن یزید رضی اللہ عنہما سے مروی حدیث «نَظَرْتُ إِلَىٰ خَاتَمِ النُّبُوَّةِ» ”میں نے مہرِ نبوت کو دیکھا“ ”باب احکام المیاہ“ میں بیان کی گئی ہے۔ [مشكوة المصابيح/كتاب الفضائل والشمائل/حدیث: 5789]

علی بن ابی طالب رضی اللہ عنہ بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم نہ لمبے قد کے تھے نہ چھوٹے قد کے، سر مبارک ضخیم تھا، داڑھی گھنی تھی، ہاتھ اور پاؤں بھاری تھے، سرخ و سفید رنگ تھا، ہڈیوں کے جوڑ مضبوط تھے، آپ کے سینے سے ناف تک بالوں کی لمبی لکیر تھی، جب آپ چلتے تو آگے کو جھکے ہوتے گویا آپ بلندی سے نیچے اتر رہے ہیں، اور میں نے آپ صلی ‌اللہ ‌علیہ ‌وآلہ ‌وسلم کی حیاتِ مبارکہ میں آپ جیسا کوئی دیکھا نہ آپ کے بعد۔ امام ترمذی رحمہ اللہ نے اسے روایت کیا ہے اور فرمایا کہ یہ حدیث حسن صحیح ہے۔ (حسن، رواہ الترمذی)۔ [مشكوة المصابيح/كتاب الفضائل والشمائل/حدیث: 5790]

علی بن ابی طالب رضی اللہ عنہ جب نبی صلی ‌اللہ ‌علیہ ‌وآلہ ‌وسلم کے اوصاف بیان کرتے تو فرماتے: آپ صلی ‌اللہ ‌علیہ ‌وآلہ ‌وسلم نہ زیادہ لمبے تھے اور نہ زیادہ چھوٹے بلکہ آپ صلی ‌اللہ ‌علیہ ‌وآلہ ‌وسلم درمیانہ قد تھے، آپ صلی ‌اللہ ‌علیہ ‌وآلہ ‌وسلم کے بال نہ بالکل گھنگریالے تھے اور نہ بالکل سیدھے بلکہ ان دونوں صورتوں کے درمیان تھے، آپ صلی ‌اللہ ‌علیہ ‌وآلہ ‌وسلم کا چہرہ مبارک بالکل گول نہیں تھا بلکہ قدرے گولائی میں تھا، آپ صلی ‌اللہ ‌علیہ ‌وآلہ ‌وسلم کا رنگ سرخی مائل سفید تھا، آنکھیں سیاہ، دراز پلکیں، جوڑوں کی ہڈیاں ابھری ہوئی اور مضبوط تھیں، کندھوں کا درمیانی حصہ بھی بڑا اور مضبوط تھا، آپ صلی ‌اللہ ‌علیہ ‌وآلہ ‌وسلم کے بدن پر زائد بال نہیں تھے، بس سینے اور ناف تک بالوں کی ایک لکیر تھی، ہاتھ اور پاؤں بھاری تھے، جب آپ صلی ‌اللہ ‌علیہ ‌وآلہ ‌وسلم چلتے تو پاؤں اٹھا کر رکھتے گویا آپ صلی ‌اللہ ‌علیہ ‌وآلہ ‌وسلم بلندی سے اتر رہے ہیں، جب آپ صلی ‌اللہ ‌علیہ ‌وآلہ ‌وسلم کسی کی طرف التفات فرماتے تو مکمل توجہ فرماتے، آپ صلی ‌اللہ ‌علیہ ‌وآلہ ‌وسلم کے کندھوں کے درمیان مہرِ نبوت تھی اور آپ صلی ‌اللہ ‌علیہ ‌وآلہ ‌وسلم «خَاتَمُ النَّبِيِّينَ» ”خاتم النبیین“ ہیں، آپ صلی ‌اللہ ‌علیہ ‌وآلہ ‌وسلم سب سے بڑھ کر دل کے سخی تھے، سب سے زیادہ صاف گو تھے، سب سے زیادہ نرم مزاج تھے، قبیلے کے لحاظ سے سب سے زیادہ معزز تھے، جو آپ صلی ‌اللہ ‌علیہ ‌وآلہ ‌وسلم کو اچانک دیکھتا تو وہ ہیبت زدہ ہو جاتا، جو آپ صلی ‌اللہ ‌علیہ ‌وآلہ ‌وسلم کی صحبت اختیار کرتا اور واقفیت حاصل کر لیتا تو وہ آپ صلی ‌اللہ ‌علیہ ‌وآلہ ‌وسلم سے والہانہ محبت کرنے لگتا، اور آپ صلی ‌اللہ ‌علیہ ‌وآلہ ‌وسلم کے وصف بیان کرنے والا (آخر پر) یہ کہتا: میں نے آپ صلی ‌اللہ ‌علیہ ‌وآلہ ‌وسلم جیسا آپ صلی ‌اللہ ‌علیہ ‌وآلہ ‌وسلم کی حیاتِ مبارکہ میں کوئی دیکھا نہ آپ صلی ‌اللہ ‌علیہ ‌وآلہ ‌وسلم کے بعد۔ (اسنادہ ضعیف، رواہ الترمذی) [مشكوة المصابيح/كتاب الفضائل والشمائل/حدیث: 5791]

جابر رضی اللہ عنہ سے روایت ہے کہ نبی صلی ‌اللہ ‌علیہ ‌وآلہ ‌وسلم جس راہ سے گزر جاتے تو آپ کے بعد اس راہ سے گزرنے والا آپ کی خوشبو سے یا آپ کے معطر پسینے سے پہچان لیتا کہ آپ صلی ‌اللہ ‌علیہ ‌وآلہ ‌وسلم یہاں سے گزرے ہیں۔ (اسنادہ ضعیف، رواہ الدارمی) [مشكوة المصابيح/كتاب الفضائل والشمائل/حدیث: 5792]

ابو عبیدہ بن محمد بن عمار بن یاسر بیان کرتے ہیں، میں نے ربیع بنت معوذ بن عفراء رضی اللہ عنہا سے کہا: آپ ہمیں رسول اللہ صلی ‌اللہ ‌علیہ ‌وآلہ ‌وسلم کے اوصاف سے آگاہ کریں، انہوں نے فرمایا: بیٹے! اگر تم انہیں دیکھتے تو تم (ان کے چہرے مبارک کو) چمکتا ہوا سورج دیکھتے۔ اسنادہ ضعیف، رواہ الدارمی۔ [مشكوة المصابيح/كتاب الفضائل والشمائل/حدیث: 5793]

جابر بن سمرہ رضی اللہ عنہ بیان کرتے ہیں، میں نے چاندنی رات میں نبی صلی ‌اللہ ‌علیہ ‌وآلہ ‌وسلم کو دیکھا تو میں (باری باری) رسول اللہ صلی ‌اللہ ‌علیہ ‌وآلہ ‌وسلم اور چاند کی طرف دیکھنے لگا، آپ نے سرخ جوڑا زیب تن کیا ہوا تھا، اور اس وقت میری نظر میں آپ چاند سے بھی زیادہ خوبصورت تھے۔ اسنادہ ضعیف، رواہ الترمذی و الدارمی۔ [مشكوة المصابيح/كتاب الفضائل والشمائل/حدیث: 5794]

ابوہریرہ رضی اللہ عنہ بیان کرتے ہیں، میں نے رسول اللہ صلی ‌اللہ ‌علیہ ‌وآلہ ‌وسلم سے زیادہ حسین چیز کوئی نہیں دیکھی، گویا آپ کے چہرے مبارک پر سورج جلوہ ریز ہے، میں نے رسول اللہ صلی ‌اللہ ‌علیہ ‌وآلہ ‌وسلم سے زیادہ تیز رفتار کسی کو نہیں دیکھا گویا آپ کے لیے زمین لپیٹی جا رہی ہے، ہم پوری طرح تیز چلنے کی کوشش کرتے لیکن آپ صلی ‌اللہ ‌علیہ ‌وآلہ ‌وسلم پروا کیے بغیر چلتے رہتے (پھر بھی ہم آپ تک نہیں پہنچ سکتے تھے)۔ صحیح، رواہ الترمذی۔ [مشكوة المصابيح/كتاب الفضائل والشمائل/حدیث: 5795]

جابر بن سمرہ رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم کی پنڈلیاں پتلی تھیں، آپ صلی ‌اللہ ‌علیہ ‌وآلہ ‌وسلم صرف تبسم فرمایا کرتے تھے، جب میں آپ کو دیکھتا تو میں کہتا کہ آپ نے آنکھوں میں سرمہ لگایا ہوا ہے، حالانکہ آپ نے سرمہ نہیں لگایا ہوتا تھا۔ اسنادہ ضعیف، رواہ الترمذی۔ [مشكوة المصابيح/كتاب الفضائل والشمائل/حدیث: 5796]

ابن عباس رضی اللہ عنہما بیان کرتے ہیں کہ رسول اللہ صلی ‌اللہ ‌علیہ ‌وآلہ ‌وسلم کے سامنے کے دو دانت کشادہ تھے، جب آپ گفتگو فرماتے تو ایسے معلوم ہوتا کہ آپ کے دو دانتوں سے نور برس رہا ہے۔ «إِسْنَادُهُ ضَعِيفٌ جِدًّا، رَوَاهُ الدَّارِمِيُّ» ۔ [مشكوة المصابيح/كتاب الفضائل والشمائل/حدیث: 5797]

کعب بن مالک رضی اللہ عنہ بیان کرتے ہیں کہ جب رسول اللہ صلی ‌اللہ ‌علیہ ‌وآلہ ‌وسلم خوش ہوتے تھے تو آپ کا چہرہ چمک جاتا اور رخِ انور ایسے لگتا جیسے کہ وہ چاند کا ٹکڑا ہے اور ہم یہ چیز پہچان لیتے تھے۔ (متفق علیہ) [مشكوة المصابيح/كتاب الفضائل والشمائل/حدیث: 5798]