حدیث حاشیہ:
ان سندوں کے بیان کرنے سے حضرت امام بخاری ؒ کی غرض یہ ہے کہ ہند کی نسبت کا اختلاف ثابت کریں کسی نے ان کو فراسیہ کہا کسی نے قرشیہ اور رد کیا اس شخص پر جس نے قرشیہ کو تصحیف قرار دیاکیونکہ لیث کی روایت میں اس کے قرشیہ ہونے کی تصریح ہے مگر لیث کی روایت موصول نہیں ہے اس لیے کہ ہند فراسیہ یا قرشیہ نے آنحضرت صلی اللہ علیہ وسلم سے نہیں سنا مقصد باب وحدیث ظاہر ہے کہ جہاں فرض نماز پڑھی گئی ہو وہاں نفل بھی پڑھی جا سکتی ہے مگر دیگر روایات کی بنا پر ذرا جگہ بدل لی جائے یا کچھ کلام کر لیا جائے تاکہ فرض اور نفل نمازوں میں اختلاط کا وہم نہ ہوسکے۔

حدیث حاشیہ:
(1)
حدیث بیان کرنے کے بعد امام بخاری ؒ نے سندوں کا اختلاف بیان کیا ہے تاکہ ہند کی نسبت کا اختلاف بیان کیا جائے۔
کسی راوی نے اسے فراسیہ اور کسی نے اسے قرشیہ قرار دیا ہے۔
امام بخاری ؒ نے اس شخص کی تردید کی ہے جو قرشیہ کو تصحیف قرار دیتا ہے کیونکہ لیث کی روایت میں اس کے قرشیہ ہونے کی تصریح ہے لیکن یہ روایت موصول نہیں۔
بہرحال ہند فراسیہ یا قرشیہ نے براہ راست رسول اللہ صلی اللہ علیہ وسلم سے کچھ نہیں سنا۔
(2)
امام بخاری ؒ کا ان احادیث کو بیان کرنے کا مقصد یہ ہے کہ جہاں فرض پڑھے گئے ہوں وہاں نفل وغیرہ بھی پڑھے جا سکتے ہیں، تاہم بہتر ہے کہ دیگر صحیح روایات کے پیش نظر ذرا جگہ تبدیل کر لی جائے یا کچھ گفتگو کر لی جائے تاکہ فرض اور نفل نماز میں اختلاط کا وہم نہ ہو۔
واللہ أعلم۔
(3)
اس حدیث سے درج ذیل مسائل معلوم ہوتے ہیں:
٭ امام کو چاہیے کہ وہ مقتدی حضرات کا پورا پورا خیال رکھے جیسا کہ رسول اللہ صلی اللہ علیہ وسلم خواتین کا خیال رکھتے تھے۔
٭ ہر اس سبب سے اجتناب کرنا چاہیے جو انسان کو کسی ممنوع کام تک پہنچا دینے والا ہو۔
٭ ایسے مقامات سے احتراز کرنا چاہیے جہاں انسان پر تہمت یا کوئی الزام لگنے کا خطرہ ہو۔
٭ راستے میں مردوں کا عورتوں سے اختلاط شریعت کی نظر میں انتہائی مکروہ فعل ہے۔
٭ رسول اللہ صلی اللہ علیہ وسلم کے عہد مبارک میں عورتیں بھی نماز باجماعت ادا کرتی تھیں۔
(فتح الباري: 434/2)