ابن جریج رحمہ اللہ کہتے ہیں کہ میں نے عطاء رحمہ اللہ سے پوچھا: کیا آپ نے ابن عباس رضی اللہ عنہما سے یہ کہتے سنا ہے کہ تمہیں طواف کرنے کا حکم دیا گیا ہے اور تمہیں کعبہ کے اندر داخل ہونے کا حکم نہیں دیا گیا؟ انہوں نے جواب دیا: وہ اس میں داخل ہونے سے منع نہیں کرتے تھے، لیکن میں نے انہیں یہ کہتے سنا ہے کہ مجھے اسامہ بن زید رضی اللہ عنہما نے بتایا، جب نبی اکرم صلی اللہ علیہ وسلم بیت اللہ میں داخل ہوئے تو آپ صلی اللہ علیہ وسلم نے اس کی تمام اطراف میں دعا مانگی اور اس میں نماز نہیں پڑھی، یہاں تک کہ آپ صلی اللہ علیہ وسلم باہر نکل آئے، پھر جب آپ صلی اللہ علیہ وسلم باہر نکلے تو بیت اللہ کے سامنے دو رکعتیں پڑھیں اور آپ صلی اللہ علیہ وسلم نے فرمایا: «هَذِهِ الْقِبْلَةُ» ”یہ قبلہ ہے۔“ میں نے ان سے پوچھا: اس کے جوانب سے کیا مراد ہے؟ کیا اس کے کونوں میں؟ انہوں نے کہا: بلکہ بیت اللہ کے تمام اطراف کے سامنے۔ [صحيح مسلم/كتاب الحج/حدیث: 3237]