امام عبداللہ بن مبارک رحمہ اللہ کہتے ہیں: میں نے سفیان ثوری رحمہ اللہ سے پوچھا: عباد بن کثیر کے حالات سے تو آپ آگاہ ہیں۔ وہ جب حدیث بیان کرتا ہے، تو انتہائی ناگوار یا سنگین حرکت کرتا ہے (غلط اور موضوع روایات بیان کرتا ہے) تو آپ کا کیا خیال ہے، میں لوگوں کو کہہ دوں: کہ اس سے روایت نہ لو؟ سفیان رحمہ اللہ نے کہا: ”ضرور کہو۔“ عبداللہ رحمہ اللہ کہتے ہیں: جب میں کسی ایسی مجلس میں ہوتا، جس میں عباد کا تذکرہ ہوتا، تو میں اس کی دیانت و امانت، زہد و تقویٰ کی تعریف کرتا اور کہہ دیتا: ”کہ اس سے روایت نہ لو۔“ (کیونکہ روایت بیان کرنے میں قابل اعتماد نہیں، کمزور اور موضوع روایات بیان کر دیتا ہے) یہ بات دوسری سند سے بیان کی گئی ہے کہ عبداللہ بن مبارک رحمہ اللہ بیان کرتے ہیں: میں شعبہ رحمہ اللہ کے پاس پہنچا تو انہوں نے کہا: ”یہ عباد بن کثیر ہے، اس سے بچ کر رہو۔“ (اس سے روایت نہ لو)۔ [صحيح مسلم/مقدمة/حدیث: 38]