رافع بن خدیج اور سہل بن ابی حشمہ رضی اللہ عنہما سے روایت ہے، ان دونوں نے بیان کیا کہ عبداللہ بن سہل رضی اللہ عنہ اور محیصہ بن مسعود رضی اللہ عنہ خیبر آئے اور وہ دونوں کھجوروں کے جھنڈ میں الگ ہو گئے، چنانچہ عبداللہ بن سہل رضی اللہ عنہ قتل کر دیے گئے۔ اس کے بعد عبدالرحمٰن بن سہل رضی اللہ عنہ اور مسعود رضی اللہ عنہ کے دونوں بیٹے حویصہ اور محیصہ رضی اللہ عنہما نبی صلی ‌اللہ ‌علیہ ‌وآلہ ‌وسلم کی خدمت میں حاضر ہوئے اور وہ اپنے ساتھی کے معاملے کے متعلق بات کرنے لگے، تو عبدالرحمٰن رضی اللہ عنہ نے، جو کہ لوگوں میں سب سے چھوٹے تھے، بات کرنا شروع کی تو نبی صلی ‌اللہ ‌علیہ ‌وآلہ ‌وسلم نے انہیں فرمایا: «كَبِّرِ الْكُبْرَ» ”بڑے کو اس کے بڑے ہونے کا حق دو۔“ یحییٰ بن سعید رحمہ اللہ نے فرمایا: آپ صلی ‌اللہ ‌علیہ ‌وآلہ ‌وسلم کی مراد تھی کہ جو سب سے بڑا ہے وہ کلام کرے۔ انہوں نے بات کی تو نبی صلی ‌اللہ ‌علیہ ‌وآلہ ‌وسلم نے فرمایا: ”تم اپنے مقتول ساتھی کی دیت کے متعلق پچاس قسمیں اٹھا کر حق دار بن سکتے ہو۔“ انہوں نے عرض کیا: اے اللہ کے رسول! وہ ایسا معاملہ ہے کہ ہم نے اسے دیکھا نہیں، آپ صلی ‌اللہ ‌علیہ ‌وآلہ ‌وسلم نے فرمایا: ”یہود کے پچاس آدمی قسم اٹھا کر تم سے بری ہو جائیں گے۔“ انہوں نے عرض کیا: اے اللہ کے رسول! وہ تو کافر لوگ ہیں۔ رسول اللہ صلی ‌اللہ ‌علیہ ‌وآلہ ‌وسلم نے اپنی طرف سے انہیں دیت ادا فرمائی، اور ایک روایت میں ہے: ”تم پچاس قسمیں اٹھاؤ اور اپنے قاتل یا اپنے ساتھی کے مستحق بن جاؤ۔“ رسول اللہ صلی ‌اللہ ‌علیہ ‌وآلہ ‌وسلم نے اپنی طرف سے سو اونٹنیاں بطور دیت ادا فرمائیں۔ (متفق علیہ) [مشكوة المصابيح/كتاب القصاص/حدیث: 3531]