تحقیق الحدیث:
اس روایت کی سند ضعیف ہے۔
◄ اس کی سند میں ایک راوی «رجل من الأنصار من أهل الفقه» مجہول الحال ہے۔
میرے علم کے مطابق کسی نے بھی اس کی توثیق نہیں کی۔
کسی کو، زمانہ تدوین حدیث میں «من أهل الفقه» اور «غير متهم» کہنا توثیق نہیں ہوتی۔
◄ مسند أحمد [6/1] اور مسند ابی یعلی [ح10] مسند البزار [البحرالزخار 56/1 ح4] التاریخ الکبیر للبخاری [169/1] اور مسند ابی بکر الصدیق [ح14] میں «من اهل الفقه» ہے۔
جبکہ کشف الاستار [ح1] میں «من اهل العبقة» اور مجمع الزوائد [14/1] میں «من اهل الثقة» غلطی سے چھپ گیا ہے۔
◄ حبیب الرحمٰن اعظمی دیوبندی نے بغیر کسی تحقیق کے «من اهل العقبة» والے الفاظ کو صحیح قرار دیا ہے جو کہ مذکورہ بالا حوالوں کی روشنی میں مردود ہے۔

تنبیہ:
مرعاۃ المفاتیح [113/1] میں بھی بغیر تحقیق کے «من اهل الثقة» لکھ دیا گیا ہے اور پھر اس کا جواب دینے کی کوشش کی گئی ہے، حالانکہ حق و انصاف یہی ہے کہ یہ الفاظ اس روایت کی سند میں ثابت ہی نہیں ہیں۔ «والله هو الموفق»
◄ مسند أحمد [7/1ح37] میں بعض حدیث کا مختصر شاہد ہے جس کی سند دو وجہ سے ضعیف ہے:
➊ ابوالحویرث عبدالرحمٰن بن معاویہ ضعیف ہے۔ [نيل المقصود: 1105] اسے جمہور محدثین نے ضعیف قرار دیا ہے۔ ديكهئے: [مجمع الزوائد 1؍8]

تنبیہ:
دوبارہ تحقیق سے معلوم ہوا کہ قول راجح میں ابوالحویرث مذکور جمہور محدثین کے نزدیک موثق ہونے کی وجہ سے حسن الحدیث تھے، لہٰذا یہ وجہ، ضعف نہیں ہے۔
➋ سند منقطع ہے۔ محمد بن جبیر نے سیدنا عثمان رضی اللہ عنہ سے کچھ نہیں سنا، لہٰذا اس سند کو بوصیری اور سیوطی کا حسن قرار دینا غلط ہے۔
شاہد دوم:
سیدنا عثمان رضی اللہ علیہ کے ذکر کے بغیر، بعض حدیث کا شاہد مسند أحمد [28/1ح187] میں ہے۔ اس کی سند بھی مجالد بن سعید (ضعیف) کی وجہ سے ضعیف ہے۔
شاہد سوم:
سیدنا عثمان رضی اللہ عنہ کے ذکر کے ساتھ، اس سیاق کے بغیر، بعض حدیث کا شاہد مسند أحمد [63/1 ح447] و مستدرک الحاکم [351/1] میں ہے، لیکن اس شاہد کی سند بھی ضعیف ہے۔
اس سند میں سعید بن ابی عروبہ اور قتادہ بن دعامہ دونوں مدلس ہیں اور «عن» سے روایت کر رہے ہیں، لہٰذا اس سند کو «صحيح على شرط الشيخين» کہنا غلط ہے۔
شاہد چہارم:
مسند ابی یعلیٰ [ح9] البحرالزخار [ح5] مسند ابی بکر الصدیق للمروزی [ح7، 8] اور شعب الایمان للبیہقی [107/1ح92] وغیرہ میں «الزهري عن سعيد بن المسيب عن عثمان عن ابي بكر» کی سند سے مروی ہے۔ یہ سند بھی ضعیف ہے۔
زہری مدلس ہیں اور روایت «عن» سے ہے۔ امام بخاری اس روایت کے بارے میں فرماتے ہیں کہ «ولا يصح فيه سعيد» “ اس میں سعید کا لفظ صحیح نہیں ہے۔ [التارخ الكبير169/1]
آپ نے دیکھ لیا کہ اس متن والی یہ روایت اپنے تمام شواہد کے ساتھ ضعیف و مردود ہے۔ تاہم یہ بات بالکل صحیح و ثابت ہےکہ نجات کا دارومدار سچے دل سے لا الہٰ الا اللہ اور محمد رسول اللہ کا اقرار ہے۔ بشرطیکہ آدمی ہر قسم کے شرک و کفر سے اعلان برأت کر لے۔
سیدنا عثمان رضی اللہ عنہ فرماتے ہیں کہ رسول اللہ صلی اللہ علیہ و سلم نے فرمایا: «من مات وهو يعلم أنه لا إلٰه إلا الله دخل الجنة» جو آدمی اس حالت میں مرے کہ وہ (سچے دل سے) جانتا ہو کہ اللہ کے سوا کوئی الٰہ نہیں ہے (اور محمد صلی اللہ علیہ و سلم اللہ کے رسول ہیں) تو جنت میں داخل ہو گا۔ [صحيح مسلم: 26/136]
سیدنا عثمان رضی اللہ عنہ نے یہ روایت نبی کریم صلی اللہ علیہ و سلم سے بذات خود سنی تھی۔ دیکھئے: [صحيح مسلم 26/137]

تنبیہ بلیغ:
روایت مذکورہ سے مشابہ قصہ سیدنا طلحہ بن عبید اللہ رضی اللہ عنہ سے مروی ہے، جنہیں سیدنا عمر رضی اللہ عنہ نے حدیث سنائی تھی۔ دیکھئے مسند أحمد [161/1ح1386] و عمل الیوم و الليلة للنسائی [1100] وسندہ صحیح، و صححہ الحاکم علی شرط الشیخین [350/1، 351] ووافقہ الذہبی (!)
شرک و کفر کرنے والا شحض اگر آخری وقت میں یہ کلمہ پڑھ لے اور شرک و کفر سے اعلان برأت کر دے تو نجات پا لے گا۔ «والله غفور رحيم»

تنبیہ:
بعض لوگوں نے سیدنا عثمان رضی اللہ عنہ سے مروی اس غیر ثابت روایت کی تاویلات و تشریحات بھی کی ہیں لیکن جب روایت ہی ضعیف ہو گئی تو ان تاویلات وتشریحات کی کوئی ضرورت نہیں ہے۔