عمر رضی اللہ عنہ بیان کرتے ہیں، رسول اللہ صلی ‌اللہ ‌علیہ ‌وآلہ ‌وسلم نے فرمایا: ”جب مؤذن کہتا ہے: «اللهُ أَكْبَرُ اللهُ أَكْبَرُ» ”اللہ سب سے بڑا ہے، اللہ سب سے بڑا ہے“، اور تم میں سے بھی کوئی خلوصِ قلب سے «اللهُ أَكْبَرُ اللهُ أَكْبَرُ» کہتا ہے، پھر وہ کہتا ہے: «أَشْهَدُ أَنْ لَا إِلٰهَ إِلَّا اللهُ» ”میں گواہی دیتا ہوں کہ اللہ کے سوا کوئی معبودِ برحق نہیں“، اور وہ شخص بھی یہی کلمات کہتا ہے، پھر وہ کہتا ہے: «أَشْهَدُ أَنَّ مُحَمَّدًا رَسُولُ اللهِ» ”میں گواہی دیتا ہوں کہ محمد صلی ‌اللہ ‌علیہ ‌وآلہ ‌وسلم اللہ کے رسول ہیں“، اور وہ شخص بھی یہی کلمات کہتا ہے، پھر وہ کہتا ہے: «حَيَّ عَلَى الصَّلَاةِ» ”نماز کی طرف آؤ“، تو وہ شخص کہتا ہے: «لَا حَوْلَ وَلَا قُوَّةَ إِلَّا بِاللهِ» ”گناہ سے بچنا اور نیکی کرنا محض اللہ کی توفیق سے ہے“، پھر وہ کہتا ہے: «حَيَّ عَلَى الْفَلَاحِ» ”کامیابی کی طرف آؤ“، تو وہ شخص کہتا ہے: «لَا حَوْلَ وَلَا قُوَّةَ إِلَّا بِاللهِ»، پھر وہ کہتا ہے: «اللهُ أَكْبَرُ اللهُ أَكْبَرُ»، تو وہ شخص بھی «اللهُ أَكْبَرُ اللهُ أَكْبَرُ» کہتا ہے، پھر وہ کہتا ہے: «لَا إِلٰهَ إِلَّا اللهُ»، تو وہ شخص بھی کہتا ہے: «لَا إِلٰهَ إِلَّا اللهُ» ”اللہ کے سوا کوئی معبودِ برحق نہیں“، تو وہ جنت میں داخل ہو گا۔“ اسے مسلم نے روایت کیا ہے۔ [مشكوة المصابيح/كتاب الصلاة/حدیث: 658]