درمیانہ تشہد اور درمیانہ قعدہ واجب ہے
➋ حضرت رفاعہ بن رافع رضی اللہ عنہ سے مروی ہے کہ نبی کریم صلی اللہ علیہ وسلم نے فرمایا:
«فإذا جلست فى وسط الصلاة فاطمئن وافترش فخذك اليسرى ثم تشهد»
”جب تم نماز کے درمیان میں بیٹھو تو اطمینان سے بیٹھو اور اپنی بائیں ران کو بچھالو پھر تشہد پڑھو۔“
[حسن: صحيح أبو داود: 766، كتاب الصلاة: باب صلاة من لا يقيم صلبه فى الركوع والسجود، تمام المنة: ص/ 170، أبو داود: 860]
(البانیؒ) اس حدیث میں پہلے تشہد کے وجوب کی دلیل ہے اور (پہلے) قعدے کا وجوب اس کے لیے لازم ہے (یعنی تشہد تب ہی ہو گا جب قعدہ ہو گا تو جب ایک واجب ہے تو دوسرا بھی واجب ہوا۔) [تمام المنة: ص/ 170]
کیونکہ یہ قاعدہ ہے کہ «ما لا يتم الواجب إلا به فهو واجب» ”جو چیز واجب کی تکمیل کے لیے ناگزیر ہو وہ بھی واجب ہے۔“ [المستصفى للغزالي: 71/1-72، تيسير التحرير: 365/1]
(شوکانیؒ) درمیانے تشہد کا حکم وہی ہے جو آخری تشہد کا ہے۔ [نيل الأوطار: 103/1]
ابن حزمؒ درمیانہ تشہد اور درمیانہ قعدہ دونوں واجب ہیں۔ [المحلى بالآثار: 299/2-301]
(احمدؒ، لیثؒ، اسحاقؒ) اسی کے قائل ہیں۔
(ابو حنیفہؒ، مالکؒ، شافعیؒ) یہ دونوں واجب نہیں ہیں۔
[الفقه الإسلامي وأدلته: 850/2، المغني: 217/2، نيل الأوطار: 103/1]
جن علماء کے نزدیک درمیانہ تشہد اور درمیانہ قعدہ واجب نہیں ہے ان کی دلیل یہ حدیث ہے۔ حضرت عبداللہ بن بحینہ رضی اللہ عنہ سے مروی ہے کہ «ان رسول الله قام من اثنتين من الظهر لم يجلس بينهما» ”رسول الله صلی اللہ علیہ وسلم ظہر کی دو رکعتوں کے متصل بعد کھڑے ہو گئے (یعنی درمیانہ تشہد نہ پڑھا) اور ان کے درمیان نہ بیٹھے جب آپ صلی اللہ علیہ وسلم نے اپنی نماز مکمل کی تو دو سجدے کرنے کے بعد سلام پھیر دیا۔ [بخاري: 1225 - 1224، كتاب الجمعة: باب ما جاء فى السهو إذا قام من ركعتي الفريضة، مسلم: 570، موطا: 96/1، دارمي: 352/1، أبو داود: 1034، ترمذي: 389، نسائي: 19/3، ابن ماجة: 1206]
امام ابن حزمؒ رقمطراز ہیں کہ یہ استدلال کچھ اہمیت نہیں رکھتا کیونکہ جس سنت سے تشہد کا وجوب ثابت ہوتا ہے اسی سنت سے یہ بھی ثابت ہوتا ہے کہ اسے بھول جانے سے (صرف دو سجدے کر لینے پر ہی) نماز ہو جاتی ہے۔ [المحلى بالآثار: 301/2]
(راجح) درمیانہ تشہد اور درمیانہ قعدہ آخری تشہد و قعدہ کی طرح ہی واجب ہیں لیکن فرق صرف اتنا ہے کہ درمیانہ تشہد و قعدہ اگر (بھول کر) رہ جائے تو سجدہ سہو اس سے کفایت کر جاتا ہے جبکہ آخری تشہد میں ایسا نہیں ہوتا۔ [المغني: 217/2، نيل الأوطار: 103/1]