فوائد:
➊ امام کے ضامن ہونے سے مراد ہے کہ امام مقتدیوں کی نماز مکمل کرانے کا ذمہ دار ہے۔ ضمان کا معنی یہاں نقصان پورا کرنا یا اچھی طرح ادا کرنا نہیں، بلکہ یہاں مراد حفاظت و نگرانی ہے۔
◈ امام خطابی رحمہ اللہ فرماتے ہیں: اہل عرب ضامن کا معنی نگران کرتے ہیں اور ضمان سے مراد نگرانی ہے۔ سو امام اس لحاظ سے ضامن ہے کہ وہ مقتدیوں کی نماز اور تعدادِ رکعات کا نگران ہے۔
➋ مؤذن امین ہے۔
◈ اس بارے میں حافظ ابن اثیر رحمہ اللہ نے ”النہایہ“ میں لکھا ہے کہ قوم کا امین وہ شخص ہے جس پر لوگ اعتماد کرتے ہیں اور جسے امین و محافظ مقرر کرتے ہیں۔ لہٰذا یہاں معنی یہ ہو گا کہ مؤذن لوگوں کی نماز اور روزے کا امین و محافظ ہے۔
◈ علامہ طیبی رحمہ اللہ کہتے ہیں: مؤذن روزوں اور نماز کے اوقات کا امین و محافظ ہے کہ لوگ نماز، روزہ اور دیگر موقوتہ وظائف کے لیے اس کی آواز پر اعتماد کرتے ہیں۔ [عون المعبود: 2/40]
➌ ان احادیث سے اذان کی فضیلت پر اور مؤذن کے امام سے افضل ہونے پر استدلال کیا جاتا ہے، کیونکہ اس حدیث کی رو سے امین ضامن سے فائق تر ہے۔ اور امام مؤذن سے افضل ہے، اس کی تاکید میں یہ قول ہے کہ امامت افضل ہے کیونکہ نبی صلی اللہ علیہ وسلم ، خلفائے راشدین اور کبار علماء نے فریضہ امامت انجام دیا ہے، اذان کی ڈیوٹی انجام نہیں دی۔ [نیل الأوطار: 2/299]