فوائد:
◈ امام نووی رحمہ اللہ فرماتے ہیں: احادیثِ باب دلیل ہیں کہ جمعہ میں تعجیل مشروع ہے اور امام مالک، ابو حنیفہ، شافعی، جمہور صحابہ و تابعین کا موقف ہے کہ زوالِ آفتاب سے قبل جمعہ کا انعقاد جائز نہیں۔
اس مسئلہ میں جمہور علماء کی مخالفت فقط امام احمد بن حنبل اور اسحاق بن راہویہ نے کی ہے، یہ دونوں ائمہ کہتے ہیں کہ زوالِ آفتاب سے قبل جمعہ کا اہتمام جائز ہے۔
جب کہ جمہور علماء نے تعجیلِ جمعہ کی روایات کو تعجیلِ جمعہ میں مبالغہ پر محمول کیا ہے کہ صحابہ کرام رضی اللہ عنہم جمعہ کے دن دوپہر کا کھانا اور قیلولہ جمعہ سے اس لیے مؤخر کرتے تھے کہ وہ جمعہ کے لیے تعجیل کو مستحب سمجھتے تھے اور نمازِ جمعہ سے قبل کسی اور کام میں مشغولیت سے جمعہ کے فوت ہونے سے خائف تھے، یہ جمعہ میں جلد شامل ہونے کے اجر و ثواب کے فوت ہونے سے ترساں رہتے تھے۔ [شرح النووي: 148/6]