فوائد:
روزوں کی فرضیت کے آغاز میں رات کے وقت روزہ داروں پر دو چیزوں کی پابندی تھی۔
➊ رات کے وقت روزہ دار کا بیوی سے مباشرت کرنا حرام تھا۔
اس کی دلیل آئندہ حدیث ہے:
❀ سیدنا براء بن عازب رضی اللہ عنہ بیان کرتے ہیں:
«لَمَّا نَزَلَ صَوْمُ رَمَضَانَ كَانُوا لَا يَقْرَبُونَ النِّسَاءَ رَمَضَانَ كُلَّهُ وَكَانَ رِجَالٌ يَخُونُونَ أَنْفُسَهُمْ فَأَنْزَلَ اللَّهُ تَعَالَى: ﴿عَلِمَ اللَّهُ أَنَّكُمْ كُنْتُمْ تَخْتَانُونَ أَنْفُسَكُمْ فَتَابَ عَلَيْكُمْ﴾ »
”جب رمضان کے روزوں کی فرضیت نازل ہوئی تو صحابہ کرام رضی اللہ عنہم پورا رمضان بیویوں کے قریب نہ جاتے تھے اور (اس دوران) کچھ لوگ اپنی جانوں سے خیانت کرتے رہے (یعنی حکم عدولی کی) چنانچہ اللہ تعالیٰ نے یہ آیت نازل کی: ﴿عَلِمَ اللَّهُ أَنَّكُمْ كُنْتُمْ تَخْتَانُونَ أَنْفُسَكُمْ فَتَابَ عَلَيْكُمْ﴾ ”ہم نے جان لیا ہے کہ تم اپنی جانوں کے ساتھ خیانت کرتے تھے تو اس نے تم پر مہربانی کی۔““ [سورة البقرة: 187] [صحیح البخاري: 4508]
پھر یہ پابندی ختم کر دی گئی اور بیوی سے مباشرت کی اجازت دے دی گئی کہ ﴿أُحِلَّ لَكُمْ لَيْلَةَ الصِّيَامِ الرَّفَثُ إِلَىٰ نِسَائِكُمْ﴾ ”تمہارے لیے روزے کی رات اپنی بیویوں سے صحبت کرنا حلال کر دیا گیا ہے۔“ [سورة البقرة: 187]
➋ روزوں کی فرضیت کی ابتداء میں سحری کی رخصت نہ تھی، بلکہ مغرب کے بعد سونے سے قبل روزہ افطار کرنے اور نیند سے قبل تک کھانے کی اجازت تھی۔
سونے کے بعد اگلی رات تک کھانا ممنوع تھا، پھر اس مذکورہ واقعہ کے بعد طلوع فجر تک کھانے کی رخصت دی گئی اور سحری کرنے کی ترغیب و فضیلت بیان کی گئی۔
لہٰذا سحری کرنا مستحب فعل قرار دیا گیا۔