فوائد:
رسول اللہ صلی اللہ علیہ وسلم ماہِ شعبان کی گنتی کا خاص لحاظ اس لیے رکھتے تھے کہ رمضان کا حقیقی تعین ہو اور رمضان کا کوئی روزہ ناقص نہ ہو۔
بلکہ شعبان کے صحیح تعین (انتیس یا تیس دن) کے بعد رمضان کا آغاز کر دیا جائے، نیز آپ صلی اللہ علیہ وسلم نے اہل اسلام کو بھی شعبان کی گنتی کا لحاظ رکھنے کی خاص تاکید فرمائی ہے۔
❀ سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:
«أَحْصُوا هِلَالَ شَعْبَانَ لِرَمَضَانَ»
”رمضان کے (روزوں کے) سبب ہلالِ شعبان کو شمار کرو (یعنی شعبان کے دن شمار کرو تاکہ رمضان کا کوئی روزہ فوت نہ ہو)۔“ [سنن الترمذي: 687، السلسلة الصحيحة: 565]
◈ حافظ ابن حجر رحمہ اللہ بیان کرتے ہیں:
اس حدیث کا مفہوم یہ ہے کہ خوب محنت سے چاند کا مطالعہ کرو اور اس کی منازل دیکھو۔ تاکہ تم پوری بصیرت سے مبنی بر حقیقت رمضان کا ادراک کر سکو کہ تم سے رمضان کا کوئی دن چھوٹ نہ جائے۔ [تحفة الأحوذي: 3/249]