فوائد:
➊ اگر روزہ دار حالتِ جنابت میں سحری تناول کر لے پھر اسی حالت میں سحری کا وقت ختم ہو جائے اور روزہ کا وقت شروع ہو جائے تو اس کا روزہ فاسد نہیں ہو گا، بلکہ ایسا شخص اذان فجر کے بعد غسل کر کے نماز ادا کر لے اور اس کا روزہ باقی رہے گا، کیونکہ اذان فجر تک جماع کی رخصت ہے اور رخصت تک مباشرت کرنا جائز ہے پھر اس وقتِ جواز کے بعد طلوع فجر ہی کو غسل ہو سکتا ہے۔ لہٰذا اس آیتِ مباشرت کا مفہوم اور نبی صلی اللہ علیہ وسلم کا فعل اس بات کی دلیل ہے کہ حالتِ جنابت میں فجر طلوع ہو جائے تو اس حالت میں روزہ رکھنا درست ہے اور ایسے شخص پر کسی قسم کا کوئی حرج نہیں۔
➋ ان احادیث میں سیدنا ابوہریرہ رضی اللہ عنہ کی فضیلت و عظمت کا بیان ہے کہ نبی صلی اللہ علیہ وسلم کا عملی فعل سامنے آنے پر انہوں نے اپنے فتوے سے رجوع کر لیا۔ لہٰذا خیر و عظمت اسی چیز میں ہے کہ انسان اصل حقیقت معلوم ہونے پر اور دلیل کے سامنے سر تسلیم خم کر دے اور اپنا موقف ترک کر دے۔
➌ ◈ امام نووی رحمہ اللہ بیان کرتے ہیں: اگر حیض اور نفاس والی عورتوں کا خون رات کے وقت بند ہو جائے، پھر وقتِ طلوع فجر تک انہوں نے غسل نہ کیا ہو تو ان کا روزہ درست ہے، جسے مکمل کرنا واجب ہے۔ خواہ انہوں نے غسل عمداً ترک کیا ہو یا بھول کر، شافعیہ اور جمیع علماء کا یہی موقف ہے۔ [شرح النووي: 222/7]