فوائد:
➊ غلام اور باندی پر فرض فطرانہ کی رقم مالک پر لازم ہے۔ غلام اور باندی اپنا فطرانہ ادا نہیں کریں گے، بلکہ ان کا فطرانہ ان کے مالک پر فرض ہے۔ اس کی صریح دلیل آئندہ حدیث ہے۔
❀ ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:
«لَيْسَ فِي الْعَبْدِ صَدَقَةٌ اِلَّا صَدَقَةُ الْفِطْرِ.»
”غلام میں صدقہ فطر کے سوا کوئی زکوٰۃ نہیں۔“ [صحیح مسلم: 982، سنن أبي داؤد: 1594]
◈ امام نووی رحمہ اللہ بیان کرتے ہیں:
”یہ حدیث صریح نص ہے کہ غلام کا فطرانہ اس کے آقا پر واجب ہے، خواہ غلام خدمت کے لیے ہو یا تجارت کے لیے۔ شافعی، مالک اور جمہور علماء کا یہی مذہب ہے۔“ [شرح النووي: 55/7]
➋ صدقہ فطر صرف مسلم شخص پر فرض ہے۔ اور کافر غلام، کافر بیوی، کافر اولاد اور کافر والدین کی طرف سے مسلمان پر صدقہ فطر لازم نہیں، اگرچہ ان کا نفقہ اس کے ذمہ لازم ہے۔ مالک، شافعی اور جمہور علماء اسی موقف کے قائل ہیں۔ [شرح النووي: 159/7]
◈ اور شوکانی رحمہ اللہ کہتے ہیں کہ صدقہ فطر کے وجوب کے لیے مسلمان ہونا شرط ہے اور کافر پر صدقہ فطر واجب نہیں۔ [نیل الأوطار: 194/4]