فوائد:
➊ شافعیہ کہتے ہیں: جنابت سے غسل کا کامل طریقہ یہ ہے کہ غسل کرنے والا برتن میں ہاتھ داخل کرنے سے قبل اولاً انہیں تین مرتبہ دھوئے۔
پھر شرمگاہ اور بدن پر لگی گندگی دھوئے، بعد ازاں نماز والا مکمل وضو کرے۔
پھر اپنی تمام انگلیاں پانی میں داخل کر کے لپ بھر پانی لے کر اس سے سر اور داڑھی کے بالوں کا خلال کرے۔
بعد ازاں اپنے سر پر تین لپ پانی ڈالے اور بدن پر یعنی زیرِ بغل، کانوں کے اندرونی حصوں، ناف میں، پاؤں کے اندرونی حصوں، پاؤں کی انگلیوں کے درمیان اور پیٹ کی سلوٹوں وغیرہ تک بطور خاص پانی پہنچائے۔
پھر اپنے سر پر تین لپ پانی بہائے اور بعد میں تمام جسم پر تین مرتبہ پانی بہائے اور ہر مرتبہ جہاں تک ہاتھ پہنچتے ہوں جسم کو ہاتھوں سے ملے۔
نیز اگر کوئی شخص نہر یا تالاب پر غسل کرے تو وہ اس میں تین غوطے لگائے اور تمام جلد اور گھنے اور ہلکے بالوں تک پانی پہنچائے۔
اور دورانِ غسل ظاہر و باطن بالوں اور بدن کی جڑ کو پانی سے تر کرے اور بدن کے دائیں اور بلند حصوں کو مقدم رکھنا اور قبلہ کی طرف منہ کر کے غسل کرنا مستحب عمل ہے۔
وضو سے فراغت کے بعد «أَشْهَدُ أَنْ لَا إِلٰهَ إِلَّا اللّٰهُ وَحْدَهُ لَا شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُوْلُهُ» کہے۔
اور غسل کے آغاز میں غسل کی نیت کرے اور غسل سے فراغت تک کی نیت کرنا بہتر عمل ہے۔
مذکورہ طریقہ کامل غسل کا طریقہ ہے اور غسل کے واجبات میں سے شروع غسل میں غسل کی نیت اور تمام جسم کی جلد اور بالوں تک پانی پہنچانا ہے۔
اور غسل کی شرط یہ ہے کہ غسل سے جسم نجاست سے پاک ہو جائے۔ [شرح النووي: 3/ 227-228]
➋ غسلِ جنابت میں وضو کے وجوب کے صرف داؤد ظاہری قائل ہیں۔
باقی علماء کے نزدیک غسلِ جنابت سے قبل وضو کرنا مسنون عمل ہے اور اگر غسل کرنے والا وضو کے بغیر تمام بدن پر پانی بہائے تو اس کا غسل صحیح ہوگا۔
لیکن غسل سے پہلے وضو کرنا افضل عمل ہے۔