فوائد:
➊ تمام اہل اسلام کا اجماع ہے کہ تلبیہ کہنا مشروع ہے۔ پھر علماء کا اس کے وجوب میں اختلاف ہے۔ شافعی اور دیگر علماء کا موقف ہے کہ تلبیہ کہنا سنت ہے۔ صحتِ حج کے لیے یہ شرط اور واجب نہیں، اور اگر حاجی و معتمر تلبیہ چھوڑ بھی دے تو اس کا حج درست ہے اور اس پر کوئی فدیہ نہیں، لیکن وہ اس کی فضیلت سے محروم رہے گا۔
➋ تلبیہ کہتے وقت آواز بلند کرنا مستحب فعل ہے، اور عورت کے لیے آواز بلند کرنا مشروع نہیں، کیونکہ اس کی بلند آواز فتنہ کا باعث ہے۔ اور حج وعمرہ میں بکثرت تلبیہ کہنا مستحب ہے، خصوصاً دن رات کی آمد، بلندی پر چڑھتے اترتے، اجتماع، قیام و قعود، سوار ہوتے، سواری سے اترتے، نمازوں کے بعد اور تمام مساجد میں تلبیہ کا اہتمام افضل ہے۔ اور راجح یہ ہے کہ طواف اور سعی کے وقت تلبیہ نہ کہا جائے، کیونکہ ان اوقات کے مخصوص اذکار ہیں۔ [شرح النووي: 8/91]
➌ تلبیہ میں احادیثِ الباب میں مذکور الفاظ کا ورد مشروع و مسنون ہے۔