فوائد:
➊ علماء کا اس مسئلہ پر اتفاق ہے کہ محرم کے لیے خشکی کا شکار حرام ہے اور ◈ شافعی اور دیگر علماء کہتے ہیں کہ محرم کے لیے بیع اور ہبہ کے ذریعہ شکار کا مالک بننا بھی حرام ہے۔
➋ محرم کے لیے شکار کا گوشت، خواہ محرم خود شکار کرے یا اس کی خاطر شکار کیا جائے، محرم کے لیے حرام ہے، خواہ شکار اس کی اجازت سے ہو یا بلا اجازت کیا گیا ہو۔
➌ اگر غیر محرم اپنے لیے شکار کرے اور محرم کو کھلانا مقصود نہ ہو، پھر وہ گوشت محرم کو ہدیہ کر دے یا شکار کا گوشت خرید کر محرم کو دے دے، تو ایسا گوشت محرم کے لیے حلال ہے۔ ◈ شافعیہ، مالک، احمد اور داؤد ظاہری اسی موقف کے قائل ہیں۔ [شرح النووي: 8/105]
➍ محرم کے لیے شکار کرنا، شکار کی طرف اشارہ کرنا یا شکار کی اطلاع دینا حرام ہے، نیز شکار کو بھڑکانا بھی ناجائز ہے۔
➎ محرم کے لیے ایسا شکار ممنوع ہے جو اس کی خاطر، اس کی اطلاع پر یا اس کی اعانت سے شکار کیا گیا ہو۔
➏ محرم کے لیے خشکی کے جانور کے انڈے ضائع کرنا، انہیں خریدنا اور بیچنا حرام ہے، اسی طرح کسی شکاری جانور کا دودھ دوہنا بھی ناجائز ہے۔ [فقه السنة: 1/599]
➐ محرم کے لیے سمندر کا ہر قسم کا شکار حلال ہے، خواہ وہ شکار اس نے خود کیا ہو، اس کی خاطر کیا ہو، اسے ہدیہ ملا ہو یا اس نے خریدا ہو۔ فرمانِ باری تعالیٰ ہے: ﴿أُحِلَّ لَكُمۡ صَيۡدُ ٱلۡبَحۡرِ وَطَعَامُهُۥ مَتَٰعٗا لَّكُمۡ وَلِلسَّيَّارَةِ﴾ ”تمہارے لیے سمندر کا شکار اور اس کا کھانا حلال کر دیا گیا ہے کہ تمہارے لیے اور قافلے کے لیے سامانِ زندگی ہے۔“ [سورة المائدة: 96]