فوائد:
➊ انسان کی منی کی طہارت کے بارے میں علماء کا اختلاف ہے۔
چنانچہ مالک اور ابوحنیفہ رحمہما اللہ منی کے نجس ہونے کے قائل ہیں۔
البتہ ابوحنیفہ رحمہ اللہ کہتے ہیں: خشک منی کو کھرچنا کافی ہے اور مالک رحمہ اللہ کا قول ہے کہ خشک و تر منی کو دھونا واجب ہے۔
لیث رحمہ اللہ کا قول ہے منی نجس ہے، لیکن اس سے نماز دوبارہ پڑھنا لازم نہیں۔
حسن بصری رحمہ اللہ کہتے ہیں: اگر کپڑے پر زیادہ منی لگی ہو تو نماز دہرانا ضروری نہیں لیکن بدن پر معمولی منی لگی ہو تو نماز دوبارہ پڑھی جائے۔
لیکن اکثر علماء کا موقف ہے کہ منی پاک ہے۔
علی بن ابی طالب، سعد بن ابی وقاص، ابن عمر، عائشہ رضی اللہ عنہم، داود ظاہری، احمد، شافعی اور محمد بن سیرین رحمہ اللہ اسی موقف کے قائل ہیں۔
منی کے نجس ہونے کے قائلین کی دلیل وہ روایات ہیں جن میں منی کو دھونے کا بیان ہے اور منی کی طہارت کے قائلین کی دلیل وہ روایات ہیں جن میں منی کو کھرچنے کا حکم ہے کیونکہ اگر منی نجس ہوتی تو اسے کھرچنا ناکافی ہوتا۔
جیسے حیض کے خون کو کھرچنا ناکافی ہے۔
نیز ان کے نزدیک منی کو دھونے والی روایات کو استحباب اور زیادہ صفائی پر محمول کیا جائے گا۔
نیز راجح قول یہ ہے کہ مرد و عورت کی منی پاک ہے۔ [شرح نووی: 197/3]
➋ ◈ حافظ ابن حجر رحمہ اللہ کہتے ہیں:
منی کی طہارت کے قائلین کا قول راجح ہے کیونکہ اس صورت میں خبر و قیاس دونوں پر عمل ہوتا ہے، کیونکہ اگر منی نجس ہوتی تو قیاس کی رو سے اسے دھونا واجب ہوتا جیسے حیض کے خون کو دھونا واجب ہے۔
اور اسے کھرچنا ناکافی ہے۔ [نیل الاوطار: 66/1]