فوائد:
➊ قربانی اور ہدی کے لیے کھیرے بکرے کی قربانی جائز نہیں، بلکہ بکری، اونٹ اور گائے میں سے جانور کا دو دانتا ہونا شرط ہے اور اس حدیث میں بکری کے جزعہ کی قربانی کی رخصت صرف عقبہ بن عامر رضی اللہ عنہ ہی کو تھی۔
➋ ❀ چنانچہ سیدنا عقبہ بن عامر رضی اللہ عنہ بیان کرتے ہیں کہ رسول اللہ صلی اللہ علیہ وسلم نے مجھے کچھ بکریاں دیں کہ میں انہیں بطور قربانی اپنے رفقاء میں تقسیم کروں، پھر اس تقسیم کے بعد بکری کا ایک کھیرا بچا تو آپ صلی اللہ علیہ وسلم نے فرمایا: ”تم اس کی قربانی دو اور میں کسی اور کو (بکری کا کھیرا قربانی کرنے کی) رخصت نہیں دیتا۔“ [سنن البيهقي: 270/9]
➌ ◈ امام ترمذی رحمہ اللہ بیان کرتے ہیں: ”اہل علم کا اس مسئلہ پر اجماع ہے کہ قربانی میں بکری کا کھیرا نا کافی ہے اور قربانی میں (دو دانتا نہ ملنے کی صورت میں) صرف بھیڑ کا کھیرا کفایت کرتا ہے۔“ [جامع الترمذي، تحت حديث: 1508]