فوائد:
➊ انسان کا پیشاب نجس ہے اور اس پر اجماع منقول ہے۔ صغیر و کبیر کے پیشاب میں کوئی فرق نہیں۔ البتہ شیر خوار بچے کے پیشاب پر چھینٹے مارنے سے طہارت حاصل ہو جاتی ہے۔
➋ مسجد کا احترام اور اسے نجاست و گندگی سے محفوظ رکھنا ضروری ہے۔
➌ نجس زمین پر پانی بہانے سے وہ پاک ہو جاتی ہے اور طہارت کے لیے اسے کھودنا شرط نہیں ہے۔ شافعیہ اور جمہور علماء کا یہی مذہب ہے۔
➍ نجاست و غلاظت کو دھونے والا پانی پاک ہوتا ہے۔
➎ اگر جاہل آدمی شریعت کی مخالفت استخفاف و عناد سے نہ کرے تو غلطی میں اس سے نرم سلوک کیا جائے اور بعد میں اسے ضروری تعلیم سے آگاہ کیا جائے۔
➏ دو ضرر رساں چیزوں میں سے کم ضرر والی چیز کے احتمال کے باوجود زیادہ ضرر رساں چیز کا خاتمہ کیا جائے۔
❀ کیونکہ آپ صلی اللہ علیہ وسلم نے دیہاتی شخص کو پیشاب کرتے دیکھ کر فرمایا: ”اسے چھوڑ دو۔“
◈ علماء بیان کرتے ہیں کہ آپ صلی اللہ علیہ وسلم کے اس فرمان (اسے چھوڑ دو) میں دو مصلحتیں ہیں:
➐ اگر آپ اس کا پیشاب بند کرا دیتے تو وہ تکلیف سے دو چار ہوتا۔ جب کہ نجاست تو واقع ہو چکی تھی، لہٰذا پیشاب کی زیادتی کا احتمال اسے تکلیف سے دو چار کرنے سے بہتر تھا۔
➑ اس دیہاتی کے پیشاب سے مسجد کا معمولی حصہ نجس ہوا تھا۔ لیکن صحابہ کرام رضی اللہ عنہم اگر اسے پیشاب کے دوران روک دیتے تو اس وجہ سے اس کے کپڑے، بدن اور مسجد کی زیادہ جگہ نجس ہو جاتی۔
➒ مساجد کو غلاظت، کوڑا کرکٹ، تھوک، شور، جھگڑے، بیع و شراء اور ہر قسم کے عقود سے محفوظ رکھنا لازم امر ہے۔ [شرح النووي: 189/3، 190]