فوائد:
➊ ◈ امام بغوی رحمہ اللہ [شرح السنة] میں رقم طراز ہیں کہ اکثر علماء کا مذہب ظاہر حدیث کے موافق ہے کہ اگر موزے یا جوتے کے اکثر حصہ کو نجاست لگ گئی ہو، پھر اسے زمین پر رگڑنے سے اکثر نجاست ختم ہو جائے تو وہ جوتا پاک ہو جاتا ہے اور اس میں نماز پڑھنا جائز ہے۔
شافعی کا قدیم قول یہی ہے لیکن ان کا جدید قول یہ ہے کہ اس صورت میں نجس جوتے وغیرہ کو پانی سے دھونا واجب ہے۔
➋ ◈ شاہ ولی اللہ دہلوی رحمہ اللہ [حجة اللہ البالغہ] میں بیان کرتے ہیں کہ جوتے اور موزے کو ایسی نجاست لگ گئی ہے، جس کی ساخت ایسی ہے کہ وہ زمین پر رگڑنے سے پاک ہو جاتی ہے کیونکہ جوتے اور موزے کا تلا وغیرہ سخت ہوتا ہے، جس سے نجاست جوتے میں داخل نہیں ہو سکتی، نیز خشک و تر نجاست کی صفائی کے بارے میں یہی حکم ہے۔ [عون المعبود: 57/2]