فوائد:
➊ معراج کی رات نمازِ مغرب کے سوا باقی نمازیں دو دو رکعت فرض قرار پائی تھیں، البتہ ابتدائے فرضیت سے ہی نمازِ مغرب تین رکعت فرض قرار دی گئی تھی، اس لیے کہ یہ دن کی وتر نماز ہے۔
➋ ہجرت کے بعد نمازِ فجر و مغرب کے علاوہ حالتِ اقامت کی دیگر نمازوں کی رکعات چار چار فرض قرار پائیں، البتہ نمازِ فجر کی دو رکعت ہی فرض رہنے دی گئیں کیونکہ ان میں قراءت طویل ہوتی ہے اور نمازِ مغرب میں بھی اضافہ نہ کیا گیا۔
➌ پھر دوبارہ حالتِ سفر میں فرض نمازوں میں تخفیف ہوئی اور فجر و مغرب کے سوا باقی نمازیں حالتِ قصر میں دو دو رکعت فرض ہوئیں۔
البتہ فجر و مغرب کی نمازیں سفر و حضر میں اپنی اصل رکعات پر باقی ہیں۔
◈ ابنِ منذر رحمہ اللہ نے اس بات پر اجماع نقل کیا ہے کہ سفر میں فجر و مغرب میں تخفیف و قصر نہیں ہے۔