فوائد:
➊ یہ حدیث دلیل ہے کہ مؤذن کی اذان سننے والی تمام مخلوقات قیامت کے دن مؤذن کے حق میں گواہی دیں گی، جو مؤذن کے لیے بہت بڑی فضیلت ہے۔
لہٰذا اس فریضہ کی ادائیگی میں بڑھ چڑھ کر حصہ لینا چاہیے، بالخصوص خوش الحان لوگ اذان کی ذمہ داری کا ادراک کریں۔
➋ ◈ توربشتی رحمہ اللہ کہتے ہیں: اس شہادت سے مراد یہ ہے کہ روزِ قیامت اللہ تعالیٰ مشہود لہ (مؤذن) کی فضیلت اور بلندیِ درجات کی مخلوقات کے سامنے تشہیر کریں گے۔
یعنی جیسے شہادت کے ذریعے بعض لوگوں کو اللہ تعالیٰ رسوا کریں گے، اسی طرح کچھ لوگوں کو گواہی کے ذریعے اکرام و تکریم سے نوازیں گے۔ ** [فتح الباري: 118/2] **
➌ بآواز بلند اذان کہنا مشروع و مستحب فعل ہے۔
چنانچہ اذان کی آواز جتنی دور جائے گی، اس کی نیکیوں میں اتنا اضافہ اور گناہوں میں اتنی ہی تخفیف ہو گی۔
نیز اذان میں آواز کا بلند ہونا شیطان کے لیے اتنا ہی زیادہ تکلیف کا باعث ہے۔