فوائد:
➊ یہ احادیث دلیل ہیں کہ نماز کے لیے پیدل چل کر آنے اور واپس جانے والے نمازی حضرات کو اجر و ثواب ملتا ہے اور جو شخص نماز کے لیے جتنی دور سے آئے اسے اتنا ہی زیادہ اجر ملتا ہے۔
❀ جو شخص مسجد کی طرف پیدل چلتا ہے، تو اس کے دونوں قدموں میں سے ایک قدم گناہ مٹاتا اور دوسرا قدم درجہ بلند کرتا ہے۔ [صحيح مسلم: 666]
➋ لہٰذا مساجد کے قریب رہائش اختیار کرنے کے بجائے مساجد سے دور رہائش اختیار کرنا افضل ہے، مگر یہ اس وقت ہے جب کوئی شخص نماز باجماعت مسجد میں ادا کرتا ہو۔
مسجد سے دور ہونے کی وجہ سے اگر کسی کی جماعت چھوٹ جاتی ہو تو اس صورت میں نماز باجماعت پانے کے لیے مسجد کے قریب رہائش اختیار کرنا زیادہ مناسب ہے کیونکہ جلبِ منفعت پر دفعِ مضرت مقدم ہے۔