فوائد:
➊ عذاب قبر برحق ہے، معتزلہ کے برعکس اہل حق کا یہی مذہب ہے۔
➋ انسان کا پیشاب نجس ہے، اور اس حدیث میں چغلی اور غیبت کی سخت حرمت کا بیان ہے۔
[نووي: 201/3]
➌ پیشاب آلود کپڑوں سے احتراز کرنا چاہیے، کپڑوں اور بدن پر لگی نجاست کا بھی یہ حکم ہے اور نجاستوں کو زائل کرنا واجب ہے، نیز پیشاب سے بے احتیاطی عذاب قبر میں مبتلا ہونے کا بڑا سبب ہے۔ ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:
«أكْثَرُ عَذَابِ الْقَبْرِ مِنَ الْبَوْلِ»
”عذاب قبر کا اکثر باعث پیشاب ہے۔“
[ابن ماجه: 348، احمد: 326/2، حاكم: 183/1، صحيح الجامع: 1202، صحيح]
➍ عذاب میں تخفیف کا سبب وہ شاخ نہیں تھی بلکہ اس کے ذریعے اس وقت کا تعین کیا گیا جس میں ان قبر والوں کے عذاب میں تخفیف ہو گی۔