فوائد:
➊ یہ احادیث دلیل ہیں کہ اگر نماز کے وقت کھانا حاضر ہو تو نماز سے قبل کھانا مستحب فعل ہے، تاکہ انسان کا دل خیالات سے فارغ اور نماز میں یکسو ہو۔ نیز اس دوران کھانے میں عجلت کرنا مکروہ فعل ہے۔ [المغنی لابن قدامہ: 107/3]
➋ یہ تخفیف اس شخص کے لیے ہے جس کے سامنے واقعی کھانا حاضر ہو۔ اور جس کے سامنے کھانا نہ رکھا گیا ہو بلکہ ابھی کھانا تیار ہو رہا ہو، تو اس کے لیے نماز باجماعت چھوڑنا جائز نہیں۔
➌ کھانے کا حاضر ہونا نماز باجماعت ترک کرنے کا شرعی عذر ہے۔ لہٰذا کھانے کی موجودگی کی صورت میں نماز باجماعت ترک کرنا جائز ہے، لیکن نماز چھوڑنے کے لیے ان احادیث کو ڈھال بنانا جائز نہیں ہے۔