سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم ایک انصاری خاتون کے ہاں تشریف لائے۔ راوی بیان کرتے ہیں کہ اس خاتون نے کھجوروں کے جھنڈ کے سائے کے قریب آپ کے لیے دسترخوان بچھایا اور اس کے ارد گرد پانی چھڑک دیا۔ اس نے ایک بکری ذبح کی تھی، نبی اکرم صلی اللہ علیہ وسلم نے اس کا گوشت کھایا اور آپ کے ہمراہ ہم نے بھی کھایا۔ پھر نبی اکرم صلی اللہ علیہ وسلم نے کھجوروں کے جھنڈ کے نیچے قیلولہ کیا، پھر آپ بیدار ہوئے تو آپ نے وضو کیا اور ظہر کی نماز ادا کی۔ اس خاتون نے عرض کی: یا رسول اللہ! ہمارے پاس کھانے میں سے کچھ بچا ہوا ہے، تو کیا آپ اسے مزید کھانا پسند کریں گے؟ نبی اکرم صلی اللہ علیہ وسلم نے ارشاد فرمایا: ”جی ہاں۔“ تو آپ نے اسے کھایا اور آپ کے ہمراہ ہم نے بھی کھایا، پھر آپ نے (ازسرنو) وضو کیے بغیر نماز ادا کی۔ [صحیح ابن حبان/كتاب الطهارة/حدیث: 1138]