سیدنا سہل بن سعد رضی اللہ عنہ بیان کرتے ہیں کہ سیدنا ابی بن کعب رضی اللہ عنہ نے مجھے یہ بات بتائی ہے کہ لوگ جو یہ مسئلہ بیان کرتے ہیں: «الْمَاءُ مِنَ الْمَاءِ» ”پانی کے نتیجے میں پانی (یعنی منی کے خروج کی صورت میں ہی) غسل لازم ہوتا ہے“، تو یہ ایک رخصت تھی جو نبی اکرم صلی اللہ علیہ وسلم نے ابتدائی زمانے (راوی کو شک ہے شاید یہ الفاظ ہیں) اسلام کی ابتدا میں عطا کی تھی، پھر آپ صلی اللہ علیہ وسلم نے اس کے بعد غسل کرنے کا حکم دیا۔ (امام ابن حبان رحمہ اللہ فرماتے ہیں:) اس بات کا امکان موجود ہے کہ سیدنا ابی بن کعب رضی اللہ عنہ نے اس فعل کے منسوخ ہونے کا پہلے ذکر کیا ہو، جیسا کہ سیدنا سہل بن سعد رضی اللہ عنہ نے ان کے حوالے سے یہ بات بیان کی ہے، پھر وہ اس بات کو بھول گئے ہوں اور انہوں نے یہ فتویٰ دیا ہو کہ اس فعل کے حوالے سے جو پہلا حکم تھا اسے منسوخ کر دیا گیا، جیسا کہ زید بن خالد جہنی رضی اللہ عنہ نے ان کے حوالے سے یہ بات بیان کی ہے۔ [صحیح ابن حبان/كتاب الطهارة/حدیث: 1179]