سیدنا مقداد بن اسود رضی اللہ عنہ بیان کرتے ہیں: انہوں نے عرض کی: یا رسول اللہ! ایسی صورت حال کے بارے میں آپ کی کیا رائے ہے، اگر میں کسی کافر کے مد مقابل آتا ہوں اور وہ میرے ساتھ لڑائی کرتا ہے، اور میرے ایک ہاتھ پر تلوار مار کر اسے کاٹ دیتا ہے، پھر (میں اس پر غالب آتا ہوں) تو وہ مجھ سے بچنے کے لئے درخت کے پیچھے جاتا ہے، اور کہتا ہے: میںاللہ تعالیٰ کے لئے اسلام قبول کرتا ہوں، تو اس شخص کے یہ کہنے کے بعد میں اسے قتل کر دوں؟ نبی اکرم صلی اللہ علیہ وسلم نے ارشاد فرمایا: تم اسے قتل نہ کرو۔ میں نے عرض کی: یا رسول اللہ! اس نے میرا ہاتھ کاٹ دیا تھا، اور اس نے اس ہاتھ کو کاٹنے کے بعد یہ بات کہی ہے۔ کیا میں اس کو قتل کر دوں؟ نبی اکرم صلی اللہ علیہ وسلم نے ارشاد فرمایا: تم اسے قتل نہ کرو، کیونکہ اگر تم اسے قتل کر دیتے ہو، تو وہ تمہاری اس جگہ پر آ جائے گا، جس جگہ تم اسے قتل کرنے سے پہلے تھے۔ اور تم اس کی اس جگہ پر چلے جاؤ گے، جو اس کے کہے ہوئے کلمے سے پہلے اس کا مقام تھا۔ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”تم اسے قتل نہ کرو، کیونکہ اگر تم اسے قتل کر دیتے ہو، تو وہ تمہاری اس جگہ پر آ جائے گا، جس جگہ تم اسے قتل کرنے سے پہلے تھے۔“ اس سے نبی اکرم صلی اللہ علیہ وسلم کی مراد یہ ہے۔ تمہیں قصاص میں قتل کر دیا جائے گا کیونکہ اسلام قبول کرنے سے پہلے اس کا خون بہانا جائز تھا، لیکن جب تم نے اس کے اسلام قبول کرنے کے بعد اسے قتل کیا تو تم ایسی حالت میں پہنچ جاؤ گے کہ تمہیں اس کے قصاص میں قتل کر دیا جائے گا۔ اس حدیث سے یہ مراد نہیں ہے: کسی مسلمان کو قتل کرنا ایسے کفر کو واجب کر دیتا ہے جو آدمی کو دین سے خارج کر دے، کیونکہاللہ تعالیٰ نے ارشاد فرمایا ہے: ”اے ایمان والو! مقتولین کے بارے میں تم پر قصاص پر لازم قرار دیا گیا ہے۔“ [صحیح ابن حبان/كتاب الإيمان/حدیث: 164]