منذر بن جریر اپنے والد (سیدنا جریر بن عبداللہ رضی اللہ عنہ) کا یہ بیان نقل کرتے ہیں کہ وہ لوگ دن چڑھے نبی اکرم صلی اللہ علیہ وسلم کے پاس موجود تھے، کچھ لوگ آپ صلی اللہ علیہ وسلم کی خدمت میں حاضر ہوئے جن کے جسم پر نامناسب لباس تھا اور پاؤں میں جوتے نہیں تھے، انہوں نے کھالیں اوڑھی ہوئی تھیں اور تلواریں لٹکائی ہوئی تھیں، ان میں سے زیادہ تر لوگوں کا تعلق مُضَر قبیلے سے تھا بلکہ ان سب کا تعلق مُضَر قبیلے سے تھا، جب نبی اکرم صلی اللہ علیہ وسلم نے ان کا فقر و فاقہ ملاحظہ فرمایا، تو آپ صلی اللہ علیہ وسلم کی پریشانی آپ صلی اللہ علیہ وسلم کے چہرہ اقدس پر مجھے نظر آئی۔ راوی کہتے ہیں: نبی اکرم صلی اللہ علیہ وسلم گھر میں تشریف لے گئے، آپ صلی اللہ علیہ وسلم نے سیدنا بلال رضی اللہ عنہ کو حکم دیا، انہوں نے اذان دی پھر انہوں نے اقامت کہی، تو نبی اکرم صلی اللہ علیہ وسلم تشریف لائے، آپ صلی اللہ علیہ وسلم نے نماز پڑھائی، پھر آپ صلی اللہ علیہ وسلم نے ارشاد فرمایا: ”(ارشادِ باری تعالیٰ ہے:) ﴿يَا أَيُّهَا النَّاسُ اتَّقُوا رَبَّكُمُ الَّذِي خَلَقَكُمْ مِنْ نَفْسٍ وَاحِدَةٍ وَخَلَقَ مِنْهَا زَوْجَهَا وَبَثَّ مِنْهُمَا رِجَالًا كَثِيرًا وَنِسَاءً وَاتَّقُوا اللَّهَ الَّذِي تَسَاءَلُونَ بِهِ وَالْأَرْحَامَ إِنَّ اللَّهَ كَانَ عَلَيْكُمْ رَقِيبًا﴾ [سورة النساء: 1] ”اے لوگو! اپنے اس پروردگار سے ڈرو جس نے تمہیں ایک ہی جان سے پیدا کیا ہے اور اس سے اس کے جوڑے کو پیدا کیا اور پھر ان دونوں سے بہت زیادہ مردوں اور عورتوں کو پھیلا دیا، اس اللہ سے ڈرو جس کے وسیلے سے تم ایک دوسرے سے مانگتے ہو اور رشتہ داری کا خیال رکھو، بے شک اللہ تعالیٰ تمہارا نگران ہے“۔“ (ایک اور مقام پر ارشادِ باری تعالیٰ ہے:) ” ﴿اتَّقُوا اللَّهَ وَلْتَنْظُرْ نَفْسٌ مَا قَدَّمَتْ لِغَدٍ﴾ [سورة الحشر: 18] ”اللہ تعالیٰ سے ڈرو اور ہر شخص اس بات کا جائزہ لے کہ اس نے آگے کے لیے کیا بھیجا ہے“۔“ (نبی اکرم صلی اللہ علیہ وسلم نے فرمایا ہے:) ”آدمی اپنے دینار میں سے، اپنے درہم میں سے، اپنے کپڑے میں سے، گندم کا ایک صاع، جو کا ایک صاع صدقہ کرے“، یہاں تک کہ نبی اکرم صلی اللہ علیہ وسلم نے نصف کھجور کا تذکرہ کیا۔ (راوی بیان کرتے ہیں:) انصار سے تعلق رکھنے والا ایک شخص ایک تھیلی لے کر آیا جسے وہ بمشکل اٹھا رہا تھا بلکہ وہ اس سے اٹھائی نہیں جا رہی تھی، پھر لوگ یکے بعد دیگرے چیزیں لانے لگے، یہاں تک کہ میں نے نبی اکرم صلی اللہ علیہ وسلم کے سامنے کپڑوں اور اناج کے دو ڈھیر دیکھے، تو میں نے نبی اکرم صلی اللہ علیہ وسلم کے چہرہ مبارک کو دیکھا کہ وہ سونے کی طرح دمک رہا تھا، پھر آپ صلی اللہ علیہ وسلم نے ارشاد فرمایا: ”جو شخص اسلام میں کسی اچھے طریقے کا آغاز کرے اور اس کے بعد اس پر عمل کیا جائے، تو اس شخص کو اس اچھے کام کا بھی اجر ملے گا اور اس کے بعد جو لوگ اس پر عمل کریں گے ان کا سا بھی اجر ملے گا، اور جو شخص کسی برے طریقے کا آغاز کرے اور اس کے بعد اس برے طریقے پر عمل کیا جائے، تو اسے اپنے برے عمل کا بھی گناہ ہوگا اور اس کے بعد جو لوگ اس برائی پر عمل کریں گے ان کا بھی اسے گناہ ہوگا“۔ (امام ابن حبان رحمہ اللہ فرماتے ہیں:) یہ روایت اس بات پر دلالت کرتی ہے کہ اللہ تعالیٰ کا یہ فرمان ﴿وَلَا تَزِرُ وَازِرَةٌ وِزْرَ أُخْرَى﴾ [سورة الأنعام: 164] ”کوئی بوجھ اٹھانے والا دوسرے کا بوجھ نہیں اٹھائے گا“ اس سے مراد بعض قسم کا بوجھ ہے، تمام اقسام کے بوجھ مراد نہیں ہیں کیونکہ اللہ تعالیٰ کی مراد کو بیان کرنے والی شخصیت (نبی اکرم صلی اللہ علیہ وسلم ) نے یہ بات بتائی ہے کہ جو شخص اسلام میں برے طریقے کا آغاز کرتا ہے اور پھر اس کے بعد اس طریقے پر عمل کیا جاتا ہے، تو اس برائی کا بوجھ اس شخص پر بھی ہوگا۔ اس کے بعد جو شخص اس برائی پر عمل کرے گا اس کا بوجھ بھی اس شخص پر ہوگا، تو گویا اللہ تعالیٰ نے یہ بات ارشاد فرمائی ہے کہ کوئی بوجھ اٹھانے والا کسی دوسرے کا بوجھ نہیں اٹھائے گا، ماسوائے اس کے جس کے بارے میں میرے رسول صلی اللہ علیہ وسلم نے تمہیں یہ اطلاع دے دی ہے کہ وہ بوجھ اٹھائے گا، اور نبی اکرم صلی اللہ علیہ وسلم نے یہ بات اللہ تعالیٰ کے حکم کے تحت ارشاد فرمائی ہے اور آپ صلی اللہ علیہ وسلم نے اس خطاب کے عموم کو اللہ تعالیٰ کے حکم کے تحت مخصوص کیا ہے۔ اس بات کی دلیل اللہ تعالیٰ کا یہ فرمان ہے: ﴿وَمَا يَنْطِقُ عَنِ الْهَوَى * إِنْ هُوَ إِلَّا وَحْيٌ يُوحَى﴾ [سورة النجم: 3-4] ”یہ رسول اپنی خواہشِ نفس سے کلام نہیں کرتا، یہ صرف وہی کلام کرتا ہے جو اس کی طرف وحی کیا جاتا ہے“۔ اس کی نظیر اللہ تعالیٰ کا یہ فرمان ہے: ﴿وَاعْلَمُوا أَنَّمَا غَنِمْتُمْ مِنْ شَيْءٍ فَأَنَّ لِلَّهِ خُمُسَهُ﴾ [سورة الأنفال: 41] ”تم لوگ یہ بات جان لو کہ تم جو بھی غنیمت حاصل کرو گے اس کا پانچواں حصہ اللہ تعالیٰ کے لیے ہوگا“۔ تو یہ خطاب عمومی طور پر ہے جس طرح اللہ تعالیٰ کا یہ فرمان ہے: ﴿وَلَا تَزِرُ وَازِرَةٌ وِزْرَ أُخْرَى﴾ [سورة الأنعام: 164] ”کوئی بوجھ اٹھانے والا کسی دوسرے کا بوجھ نہیں اٹھائے گا“۔ پھر نبی اکرم صلی اللہ علیہ وسلم نے یہ بات ارشاد فرمائی کہ ”جو شخص کسی کو قتل کرے گا تو اس مقتول کا سامان اس شخص کو مل جائے گا“۔ تو نبی اکرم صلی اللہ علیہ وسلم نے یہاں یہ اطلاع دی ہے کہ مقتول کے جسم پر موجود سامان مالِ خمس میں شامل نہیں ہوگا اور تھوڑا مال بھی اسی (قاتل) کو ملے گا، تو یہ اس مطلق عمومی حکم کی تخصیص ہو جائے گی۔ [صحیح ابن حبان/كتاب الزكاة/حدیث: 3308]