سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کے بارے میں یہ بات نقل کرتی ہیں کہ انہوں نے نبی اکرم صلی اللہ علیہ وسلم سے اللہ تعالیٰ کے اس فرمان ﴿يَوْمَ تُبَدَّلُ الْأَرْضُ غَيْرَ الْأَرْضِ وَالسَّمَاوَاتُ ۖ وَبَرَزُوا لِلَّهِ الْوَاحِدِ الْقَهَّارِ﴾ [سورة إبراهيم: 48] ”جب زمین کو دوسری زمین میں اور آسمانوں کو بھی تبدیل کر دیا جائے، تو یہ سب، ایک اور زبردست اللہ تعالیٰ کی بارگاہ میں جھک جائیں گے۔“ کے بارے میں دریافت کیا کہ اس وقت لوگ کہاں ہوں گے؟ تو نبی اکرم صلی اللہ علیہ وسلم نے فرمایا: ”وہ پل صراط پر ہوں گے۔“ سیدہ عائشہ رضی اللہ عنہا بیان کرتی ہیں: میں نے عرض کی: یا رسول اللہ! ابن جدعان زمانہ جاہلیت میں صلہ رحمی کرتا تھا اور لوگوں کو کھانا کھلاتا تھا، تو کیا یہ چیز اسے فائدہ دے گی؟ نبی اکرم صلی اللہ علیہ وسلم نے ارشاد فرمایا: ”یہ اسے فائدہ نہیں دے گی، کیونکہ اس نے کبھی بھی یہ نہیں کہا: «رَبِّ اغْفِرْ لِي خَطِيئَتِي يَوْمَ الدِّينِ» ”اے میرے پروردگار! میرے گناہوں کی مغفرت کر دینا۔““ [صحیح ابن حبان/كتاب البر والإحسان/حدیث: 331]