سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جب اللہ تعالیٰ کسی بندے سے محبت کرتا ہے، تو وہ جبرائیل علیہ السلام سے فرماتا ہے: میں فلاں شخص سے محبت کرتا ہوں تم بھی اس سے محبت رکھو، تو سیدنا جبرائیل علیہ السلام بھی اس سے محبت رکھنے لگتے ہیں۔ پھر وہ آسمان والوں کے درمیان اعلان کرتے ہیں: بیشک اللہ تعالیٰ فلاں شخص سے محبت رکھتا ہے، تو تم لوگ بھی اس سے محبت رکھو، تو آسمان والے بھی اس سے محبت رکھنے لگتے ہیں پھر اس شخص کے لیے زمین میں قبولیت رکھ دی جاتی ہے۔“ ”اور جب اللہ تعالیٰ کسی بندے کو ناپسند کرتا ہے“ مالک نامی راوی نے یہ کہا: میرا گمان ہے کہ روایت میں ناپسند کرنے کے الفاظ ہیں۔ اس کے بعد حسب سابق حدیث ہے۔ امام ابن حبان رحمہ اللہ فرماتے ہیں: یہ روایت سہیل نے اپنے والد کے حوالے سے نقل کی ہے اور انہوں نے یہ روایت قعقاع بن حکیم کے حوالے سے ان کے والد سے نقل کی ہے۔ [صحیح ابن حبان/كتاب البر والإحسان/حدیث: 365]