سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اللہ تعالیٰ یہ فرماتا ہے، جب میرا بندہ نیکی کا ارادہ کرتا ہے اور وہ اس پر عمل نہیں کرتا، تو میں اسے ایک نیکی کے طور پر نوٹ کر لیتا ہوں اور اگر وہ اس پر عمل کر لیتا ہے، تو میں اسے دس نیکیوں کے طور پر نوٹ کر لیتا ہوں اور اگر میرا بندہ کسی برائی کا ارادہ کر لیتا ہے اور وہ اس پر عمل نہیں کرتا، تو میں اسے نوٹ نہیں کرتا، اگر وہ اس پر عمل کر لیتا ہے، تو میں اسے ایک (برائی) کے طور پر نوٹ کرتا ہوں۔“ (امام ابن حبان رحمہ اللہ فرماتے ہیں:) اللہ تعالیٰ کا یہ فرمان ہے: ”جب میرا بندہ ارادہ کرتا ہے“، اس سے مراد یہ ہے کہ جب وہ عزم کرتا ہے، تو یہاں عزم کے لیے لفظ «هَمَّ» ”ہَم“ استعمال ہوا ہے۔ اس کی وجہ یہ ہے کہ «هَمٌّ» ”ہَم“ کی انتہا عزم ہے، اور عرب اپنے محاورے میں کسی ابتدا والے اسم کا اطلاق انتہا پر کر دیتے ہیں، اور انتہا والے اسم کا اطلاق آغاز پر کر دیتے ہیں۔ اس کی وجہ یہ ہے کہ ارادہ کرنا آدمی کے نامہ اعمال میں نہیں لکھا جاتا، کیونکہ وہ صرف ایک خیال ہے، اس کا کوئی حکم نہیں ہو گا۔ اور اس میں اس بات کا احتمال بھی موجود ہے کہ جو شخص نیکی کا ارادہ کرتا ہو، اللہ تعالیٰ اس کے لیے نیکی لکھ لیتا ہے، اگرچہ اس نے اس کا پختہ ارادہ نہ کیا ہو اور اس نے اس پر عمل نہ کیا ہو۔ اللہ تعالیٰ اسلام کی فضیلت کی وجہ سے ایسا کر دیتا ہو، تو اللہ تعالیٰ کا بندے کو اسلام کی توفیق دینا ایک فضل ہے، جو اس نے اپنے بندے پر کیا ہے، اور بندہ جس نیکی کا ارادہ کرتا ہے اور اس پر عمل نہیں کرتا ہے، اس کو نوٹ کر لینا بھی اللہ تعالیٰ کا فضل ہو گا، اور بندہ جس برائی کا ارادہ کرتا ہے اور اس پر عمل نہیں کرتا، تو اگر اللہ تعالیٰ اسے نوٹ کر لیتا ہے، تو یہ انصاف کے مطابق ہو گا۔ لیکن کیونکہ اس کا فضل اس کے انصاف سے آگے نکل گیا ہے، اس طرح اس کی رحمت اس کے غضب پر سبقت لے گئی ہے، تو اس کے فضل اور اس کی رحمت میں یہ بات شامل ہے کہ مسلمانوں کے کمسن بچے، جب تک بالغ نہیں ہو جاتے اس وقت تک ان کا کوئی گناہ نوٹ نہ کیا جائے، اور ان کی نیکیاں نوٹ کی جائیں۔ تو یہ اسی طرح ہو گا، اور اس میں کوئی فرق نہیں ہے۔ [صحیح ابن حبان/كتاب البر والإحسان/حدیث: 383]