سیدنا ابوبرزہ اسلمی رضی اللہ عنہ بیان کرتے ہیں: جلیبیب ایک انصاری تھا وہ خواتین کے ہاں جایا کرتا تھا اور ان کے ساتھ بات چیت کیا کرتا تھا سیدنا ابوبرزہ رضی اللہ عنہ کہتے ہیں میں نے اپنی بیوی سے کہا: جلیبیب تمہارے پاس نہ آئے۔ راوی بیان کرتے ہیں: نبی اکرم صلی اللہ علیہ وسلم کے اصحاب کا یہ معمول تھا کہ جب ان کے ہاں کی خواتین میں سے کوئی بیوہ یا طلاق یافتہ ہو جاتی، تو وہ اس خاتون کی آگے شادی اس وقت تک نہیں کرتے تھے جب تک یہ بات نہیں جان لیتے تھے کہ نبی اکرم صلی اللہ علیہ وسلم تو اس کے ساتھ شادی نہیں کرنا چاہتے؟ ایک دن نبی اکرم صلی اللہ علیہ وسلم نے ایک انصاری سے کہا: اے فلاں شخص تم اپنی بیٹی کی شادی کروا دو۔ اس نے عرض کی: جی ہاں! سر آنکھوں پر۔ نبی اکرم صلی اللہ علیہ وسلم نے فرمایا: میں خود اس کے ساتھ شادی نہیں کرنا چاہتا۔ اس انصاری نے دریافت کیا: پھر کس کے ساتھ کروں۔ نبی اکرم صلی اللہ علیہ وسلم نے فرمایا: جلیبیب کے ساتھ۔ اس نے عرض کی: یا رسول اللہ (آپ مجھے موقع دیں) تاکہ میں لڑکی کی ماں کے ساتھ مشورہ کر لوں، پھر وہ شخص اس عورت کے پاس آیا اور یہ بات بیان کی کہ نبی اکرم صلی اللہ علیہ وسلم نے تمہاری بیٹی کیلئے نکاح کا پیغام بھجوایا ہے، اس عورت نے کہا: ٹھیک ہے سر آنکھوں پر۔ اس شخص نے کہا: نبی اکرم صلی اللہ علیہ وسلم نے اپنے لیے پیغام نہیں دیا: تو عورت نے دریافت کیا: پھر نبی اکرم صلی اللہ علیہ وسلم نے کس کے لیے نکاح کا پیغام بھجوایا ہے؟ اس شخص نے بتایا: جلیبیب کیلئے۔ اس عورت نے کہا: اس نالائق جلیبیب کیلئے، پھر اس عورت نے کہا: نہیں اللہ کی قسم! میں جلیبیب کے ساتھ (اپنی بیٹی کی) شادی نہیں کروں گی۔ جب لڑکی کا باپ نبی اکرم صلی اللہ علیہ وسلم کی خدمت میں جانے کیلئے اٹھنے لگا، تو لڑکی نے پردے کے پیچھے سے اپنی ماں سے کہا: میری شادی کے بارے میں آپ کو نکاح کا پیغام کس نے بھجوایا ہے؟ ان دونوں نے جواب دیا: اللہ کے رسول نے، اس لڑکی نے دریافت کیا: تو کیا آپ لوگ اللہ کے رسول کے حکم پر عمل نہیں کریں گے، آپ مجھے اللہ کے رسول کے سپرد کر دیں، وہ مجھے ضائع نہیں کریں گے، پھر اس بچی کا باپ نبی اکرم صلی اللہ علیہ وسلم کی خدمت میں حاضر ہوا اور اس نے عرض کی: اس بچی کا معاملہ آپ کے سپرد ہے، تو نبی اکرم صلی اللہ علیہ وسلم نے اس بچی کی شادی جلیبیب سے کروا دی۔ حماد نامی راوی کہتے ہیں: اسحاق بن عبداللہ نامی راوی نے یہ بات بیان کی ہے: کیا تم جانتے ہو کہ نبی اکرم صلی اللہ علیہ وسلم نے اس بچی کیلئے کیا دعا کی تھی۔ راوی نے دریافت کیا: نبی اکرم صلی اللہ علیہ وسلم نے اس کے لیے کیا دعا کی تھی، تو اسحاق نے بتایا: (نبی اکرم صلی اللہ علیہ وسلم نے یہ دعا کی تھی) ”اے اللہ! ان دونوں پر بھلائی کو اچھی طرح انڈیل دے اور ان کی زندگی میں کوئی سختی نہ آنے دینا۔“ یہاں ثابت نامی راوی نے یہ الفاظ نقل کیے ہیں: نبی اکرم صلی اللہ علیہ وسلم نے اس لڑکی کی شادی ان صاحب سے کروا دی ایک مرتبہ نبی اکرم صلی اللہ علیہ وسلم کسی جنگ میں حصہ لینے کیلئے تشریف لے گئے تو آپ نے دریافت کیا: کیا تم کسی کو غیر موجود پاتے ہو؟ ان لوگوں نے جواب دیا: جی نہیں۔ نبی اکرم صلی اللہ علیہ وسلم نے فرمایا: لیکن مجھے جلیبیب غیر موجود محسوس ہو رہا ہے، تو تم لوگ مقتولین میں اسے تلاش کرو، تو ان لوگوں نے جلیبیب کو ایسی حالت میں پایا کہ وہ سات مشرکین کے پاس موجود تھے انہوں نے ان سات مشرکین کو قتل کیا تھا اور پھر خود شہید ہوئے تھے۔ نبی اکرم صلی اللہ علیہ وسلم نے دریافت کیا: کیا اس نے سات آدمیوں کو قتل کیا ہے اور پھر خود شہید ہوا ہے، یہ مجھ سے ہے اور میں اس سے ہوں، یہ بات نبی اکرم صلی اللہ علیہ وسلم نے سات مرتبہ ارشاد فرمائی، پھر نبی اکرم صلی اللہ علیہ وسلم نے انہیں اپنے بازوؤں پر اٹھا لیا ان کی چارپائی نبی اکرم صلی اللہ علیہ وسلم کے صرف بازو ہی تھے، یہاں تک کہ نبی اکرم صلی اللہ علیہ وسلم نے انہیں خود ان کی قبر میں اتارا۔ ثابت نامی راوی بیان کرتے ہیں: انصار میں کوئی بیوہ عورت ایسی نہیں تھی جو اس (جلیبیب کی اہلیہ) سے زیادہ خرچ کرنے والی ہو (یعنی ان سے زیادہ مال دار ہو) [صحیح ابن حبان/كتاب النكاح/حدیث: 4035]