سیدنا امام زین العابدین رحمہ اللہ بیان کرتے ہیں: نبی اکرم صلی اللہ علیہ وسلم کی زوجہ محترمہ سیدہ صفیہ بنت حیی رضی اللہ عنہا نے مجھے یہ بات بتائی میں نبی اکرم صلی اللہ علیہ وسلم کی خدمت میں حاضر ہوئی میں کچھ دیر آپ صلی اللہ علیہ وسلم کے پاس بات چیت کرتی رہی آپ صلی اللہ علیہ وسلم اس وقت مسجد میں اعتکاف کیے ہوئے تھے رات کے وقت آپ صلی اللہ علیہ وسلم مجھے گھر تک پہنچانے کے لیے میرے ساتھ اٹھے راستے میں دو انصاری افراد کی ملاقات آپ صلی اللہ علیہ وسلم سے ہوئی جب ان دونوں نے نبی اکرم صلی اللہ علیہ وسلم کو دیکھا تو وہ شرما گئے اور واپس پلٹ گئے۔ نبی اکرم صلی اللہ علیہ وسلم نے فرمایا: تم دونوں آگے آؤ یہ صفیہ بنت حیی ہے (جو میری اہلیہ ہے) ان دونوں نے عرض کی: ہم اللہ کی پناہ مانگتے ہیں اور اللہ کی پاکی بیان کرتے ہیں: (ہم آپ صلی اللہ علیہ وسلم کے بارے میں برا گمان کیسے رکھ سکتے ہیں) نبی اکرم صلی اللہ علیہ وسلم نے فرمایا: میں تم دونوں سے یہ نہیں کہہ رہا کہ تم دونوں نے کوئی برا گمان کیا ہو گا لیکن مجھے یہ بات پتہ ہے شیطان انسان کی رگوں میں گردش کرتا ہے (وہ تمہارے ذہن میں کوئی غلط خیال ڈال سکتا تھا)۔ [صحیح ابن حبان/كتاب السير/حدیث: 4496]