سیدنا انس رضی اللہ عنہ سے روایت ہے کہ غزوہ بدر کے موقع پر نبی اکرم صلی اللہ علیہ وسلم نے لوگوں سے مشورہ طلب فرمایا، تو سیدنا ابوبکر رضی اللہ عنہ نے گفتگو کی، پھر نبی اکرم صلی اللہ علیہ وسلم نے مزید رائے طلب فرمائی تو سیدنا عمر رضی اللہ عنہ نے گفتگو کی، پھر نبی اکرم صلی اللہ علیہ وسلم نے مزید رائے طلب فرمائی تو سیدنا سعد بن عبادہ رضی اللہ عنہ نے عرض کی: یا رسول اللہ صلی اللہ علیہ وسلم ! آپ ہمیں ہی مراد لے رہے ہیں؟ ”اس ذات کی قسم جس کے ہاتھ میں میری جان ہے! اگر آپ ہمیں حکم دیں کہ ہم اپنے گھوڑے سمندر میں ڈال دیں تو ہم ضرور ایسا کریں گے، اور اگر آپ ہمیں برکِ غماد تک لے چلنے کا حکم دیں تو ہم (آپ کے ساتھ) وہاں تک بھی جائیں گے۔“ تب نبی اکرم صلی اللہ علیہ وسلم نے لوگوں کو کوچ کا حکم دیا، چنانچہ وہ روانہ ہوئے یہاں تک کہ بدر پہنچ گئے۔ وہاں قریش کے قاصد آئے ہوئے تھے جن میں بنو حجاج کا ایک سیاہ فام غلام بھی تھا، صحابہ کرام رضی اللہ عنہم نے اسے پکڑ لیا اور اس سے ابوسفیان کے بارے میں پوچھنے لگے، تو وہ کہنے لگا: اللہ کی قسم! مجھے ابوسفیان کا تو علم نہیں، البتہ یہ ابوجہل، عتبہ، شیبہ اور امیہ بن خلف (لشکر کے ساتھ) آ رہے ہیں۔ جب وہ یہ کہتا تو لوگ اسے مارنا شروع کر دیتے، تو وہ کہتا: ہاں، میں تمہیں بتاتا ہوں (مجھے چھوڑ دو)۔ پھر جب وہ اسے چھوڑ دیتے تو وہ دوبارہ کہتا: اللہ کی قسم! مجھے ابوسفیان کا علم نہیں، البتہ ابوجہل، عتبہ، شیبہ اور امیہ بن خلف آ رہے ہیں۔ نبی اکرم صلی اللہ علیہ وسلم اس وقت نماز پڑھ رہے تھے، جب آپ صلی اللہ علیہ وسلم نے نماز مکمل کی تو ارشاد فرمایا: ”اس ذات کی قسم جس کے ہاتھ میں میری جان ہے! جب یہ تم سے سچ کہتا ہے تو تم اسے مارتے ہو اور جب تم سے جھوٹ بولتا ہے تو اسے چھوڑ دیتے ہو۔ یہ قریش آ گئے ہیں (جو ابوسفیان کو بچانے آئے ہیں)۔“ پھر نبی اکرم صلی اللہ علیہ وسلم زمین پر اپنے دستِ مبارک سے اشارہ کرتے ہوئے فرمانے لگے: ”یہ کل فلاں کی قتل گاہ ہو گی اور یہ کل فلاں کی قتل گاہ ہو گی۔“ سیدنا انس رضی اللہ عنہ فرماتے ہیں: اس ذات کی قسم جس کے ہاتھ میں میری جان ہے! ان میں سے کوئی بھی اس جگہ سے ذرا برابر بھی ادھر ادھر نہیں ہوا جہاں نبی اکرم صلی اللہ علیہ وسلم نے (اپنے دستِ مبارک سے) نشان لگایا تھا۔ [صحیح ابن حبان/كتاب السير/حدیث: 4722]