سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ایک نبی علیہ السلام نے اپنے ساتھیوں کے ہمراہ جنگ میں حصہ لیا، انہوں نے (روانگی سے پہلے) فرمایا: ایسا کوئی شخص میرے ساتھ نہ آئے جس نے نیا گھر بنایا ہو لیکن ابھی اس میں رہائش اختیار نہ کی ہو، اور ایسا کوئی شخص میرے ساتھ نہ آئے جس نے کسی عورت کے ساتھ شادی کر لی ہو لیکن ابھی اس کے ساتھ صحبت نہ کی ہو، یا اس نے واپس جا کر کوئی ضروری کام کرنا ہو۔“ نبی اکرم صلی اللہ علیہ وسلم فرماتے ہیں: ”ان کا دشمن سے سامنا سورج غروب ہونے کے قریب ہوا، انہوں نے دعا کی: اے اللہ! یہ (سورج بھی) حکم کا پابند ہے اور میں بھی حکم کا پابند ہوں، تو اس کو میرے لیے (غروب ہونے سے) اس وقت تک روک دے جب تک میرے اور ان (کفار) کے درمیان فیصلہ نہیں ہو جاتا، تو اللہ تعالیٰ نے سورج کو روک لیا، یہاں تک کہ اللہ تعالیٰ نے اس (نبی علیہ السلام) کو فتح نصیب کی، ان لوگوں نے مال غنیمت کو جمع کیا، لیکن اسے آگ نے نہیں کھایا، وہ لوگ جب مال غنیمت جمع کر لیتے تھے تو اللہ تعالیٰ اس پر آگ بھیج دیتا تھا جو اس کو کھا لیتی تھی۔ ان کے نبی علیہ السلام نے ان لوگوں سے کہا: تم میں سے کسی نے خیانت کی ہے، ہر قبیلے کا ایک شخص میرے پاس آ کر میری بیعت کرے، وہ لوگ اس نبی علیہ السلام کے پاس آئے، انہوں نے ان کی بیعت کی تو ان میں سے دو آدمیوں کا ہاتھ اس نبی علیہ السلام کے ہاتھ سے چپک گیا، تو اس نبی علیہ السلام نے فرمایا: تم دونوں نے خیانت کی ہے۔ ان دونوں نے جواب دیا: جی ہاں! (ہم نے) سونے سے بنے ہوئے گائے کے سر جیسی چیز (چھپائی ہوئی ہے)، پھر وہ دونوں اسے لے کر آئے اور اسے مال غنیمت میں ڈال دیا، تو اللہ تعالیٰ نے آگ کو بھیجا اور اس نے اس (مال غنیمت) کو کھا لیا۔“ (راوی بیان کرتے ہیں) اس موقع پر نبی اکرم صلی اللہ علیہ وسلم نے یہ ارشاد فرمایا: ”بے شک اللہ تعالیٰ نے ہم پر اپنی رحمت کی وجہ سے ہمیں مال غنیمت عطا کیا اور اس نے ہمیں تخفیف عطا کی کیونکہ وہ ہماری کمزوری سے واقف ہے۔“ (امام ابن حبان رحمہ اللہ فرماتے ہیں:) عبدالرحمن بن ابراہیم دمشقی نے معاذ بن ہشام سے مکہ میں احادیث کا سماع کیا ہے۔ [صحیح ابن حبان/كتاب السير/حدیث: 4807]